【一燈決】燈神:熱刺擺脫地獄賽程「尼」料

更新時間 (HKT): 2021.02.27 02:00

【名家足路】

【對決場次︰熱刺vs般尼】

上周推介華倫西亞上盤,去到加時連入兩粒擊敗切爾達,本月《一燈決》終於開齋。贏開唔好停,意西德都切磋過,今周就揀場英超同盧卡東尼拗手瓜,熱刺主場鬥般尼,雖然讓一球有啲多,但我信摩佬領軍能力,繼續撐上盤。

唔經唔覺今季呢個專欄已經寫咗第三個月,加埋13期,遺憾每次都扮演燈神角色,希望之後再見大家時,可以做一哥,咁就「寫」而無憾;同樣喺呢個專欄亮相3次嘅盧卡東尼(2次1哥1次燈神),睇佢今個月擂台長期榜尾危危乎,3月隨時encore,大家記得要捧場。

熱刺上輪倫敦打吡不敵韋斯咸,近6場聯賽輸咗5場,球隊陷入低潮嘅原因,除咗係哈利卡尼一度受傷外,其實主要都係賽程難踢,輸畀曼城、利物浦同車路士等強隊;熱刺嚟緊對手相對較弱,主場對完般尼後,之後就會連對富咸同水晶宮,相信摩佬可以把握機會領軍重上高峯,呢場對般尼可以大勝一仗振士氣。

熱刺有奧里亞同盧施素兩名傷兵,好在佢哋班底厚,基本上每位置都有替補,當然最重要嘅前鋒拍檔孫興民同卡尼就無可取替,中場賀積查治防守出色效率高,亦係今季摩佬愛將。

對手般尼近四場聯賽不敗好似好威咁,查實對手全屬下游,加上陣中傷兵多,兩大射手基斯活特同艾殊利班尼斯上陣成疑,中場貝治古蒙臣同羅比巴迪養傷,後防派達斯又拉傷鼠蹊,陣容天殘地缺,熱刺就算要讓一球或者更多,上盤相信可以穩開。

文:筋肉人

《一燈決》係今季新欄目,由上月擂台盟主同上月燈神拗吓頸,睇吓讀者信邊個。

包羅萬有,「體」得舒服,即Like「蘋果體育」FB專頁!
BannerBanner