【一燈決】一哥:博般尼打殘古板摩佬

更新時間 (HKT): 2021.02.27 02:00

【名家足路】

【對決場次︰熱刺vs般尼】

上周《一燈決》認真唔好彩,小弟推介嘅切爾達竟然臨尾香,作客華倫西亞喺補時連失兩球,受讓平/半嘅下盤輸清光。呢次可以話有賭未為輸,上盤客都估唔到去到補時先報喜,就好似小弟咁,今個月喺擂台一直長居榜尾,去到今周衝刺,大手押注兩場歐聯後暫時翻身脫離榜尾。仲有兩日時間,可唔可以安全過渡都未知,煩請各位幫我打打氣,否則就真係下個月再喺呢度以燈神姿態同大家見面。

入正題,最後一期同筋肉人嘅battle就喺英超賽場,揀嚟一場周日波,熱刺主場鬥般尼,初盤係熱刺讓一球。筋肉人揀上盤可以理解,熱刺基本上主場對親般尼都贏波而回,又咁啱佢哋喺歐霸盃大勝晉級,迪利阿里翻生,整球世紀倒掛畀大家嘆,睇落真係有機會擺脫近6場英超5場輸波嘅頹勢。不過小弟好記得般尼上個月喺一致被睇淡下竟然破咗利物浦嘅主場不敗金身贏1:0,搞到小弟想信多一次般尼。

講真,般尼最近作客真係唔差,月中仲試過大炒水晶宮3:0,連同足總盃在內,近4次作客贏咗3場,加上近期喺英超比起熱刺搶分仲多,連續四場聯賽不敗,今場受讓一球,輸一球都仲有得走盤,下盤點會博唔過?

相反,大家都知熱刺同利物浦一樣,踏入2021年後就大走樣,齋計新一年隊波應該家陣喺聯賽榜下游掙扎。摩連奴戰術太古板,來來去去得嗰一兩招,哈利卡尼同孫興民兩個近期都唔係太fit,分分鐘攻極唔入,轉個頭俾般尼反擊打殘都唔定。

文:盧卡東尼

《一燈決》係今季新欄目,由上月擂台盟主同上月燈神拗吓頸,睇吓讀者信邊個。

包羅萬有,「體」得舒服,即Like「蘋果體育」FB專頁!
BannerBanner