求驗客手記:沙維奪第五冠等頂高文

更新時間 (HKT): 2021.02.28 02:00

沙維(左)2019年5月喺艾薩德掛靴之後,隨即就做咗呢隊卡塔爾勁旅嘅教練,2年內為球隊帶嚟4個冠軍。上星期五佢帶領艾薩德出戰卡塔爾盃決賽,結果順利以2:0擊敗艾杜哈尼,成功蟬聯呢項盃賽,贏得執教生涯第五個冠軍。事實上,沙維亦都同第六項冠軍所距不遠,因為艾薩德喺卡塔爾星級聯賽遠遠拋離第2位艾杜哈尼13分,只要再贏多場就可以提前封王,認真犀利。

近月有傳沙維好有機會重返母會巴塞隆拿執教,因為喺3月7號就會舉行新會長選舉嘅巴塞,其中兩位候選人拉樸達同方特都表明,希望呢位巴塞名宿可以回歸出任教練。巴塞嘅現任教練朗奴高文嘅成績就只係一般般,而且佢嘅身體狀況都好令人擔心,上星期五佢喺對西維爾嘅賽前記者會就因為佢流鼻血(下圖)而要提前終止。呢位荷蘭籍教頭上年5月曾經做過「通波仔」手術,今次已經係佢2個月內第2次喺記者會流鼻血。

包羅萬有,「體」得舒服,即Like「蘋果體育」FB專頁!
BannerBanner