求驗客手記:同成班靚女去荒島求生兩個月 加斯居尼玩轉真人騷

更新時間 (HKT): 2021.03.01 02:00

前英格蘭足球天才加斯居尼,出晒名係球壇麻煩友,掛靴後受到酗酒等負面新聞纏身,幾年前仲捲入醉駕、火車站性侵、偷紅酒等醜聞,打甩後近期又大爆10年前疑因酒後鬧事畀老竇送過去精神病院,認真係球壇痴線佬一名。已經53歲嘅加斯居尼最近再有新搞作,佢會參加意大利真人騷,同班靚女一齊到荒島求生,仲話有信心可以贏到獎金㖭!

手機用戶請按此放大圖表

空降中美洲最怕見蛇

英國《太陽報》報道,加斯居尼將會聯同「意大利小姐」、22歲選美冠軍嘅卡羅蓮娜(Carolina Stramare)、44歲女藝人丹妮娜(Daniela Martani)同53歲嘅意大利著名女演員安祖娜梅莉洛(Angela Melillo),一齊去中美洲嘅洪都拉斯附近嘅荒島,參賽者將會被掉出直升機跳降傘,仲要冒住熱帶風暴、有毒蜘蛛等危險求生兩個月,不過加斯居尼坦言自己最驚嘅其實係蛇!

「我可以忍受冇嘢食或者其他一切考驗,但認真我最驚就係蛇,我估我一係頭24個鐘就會退出,一係我就會忍落去贏出比賽!我知呢個係一個大挑戰,唔易㗎!」𠵱家正喺意大利酒店接受隔離準備參賽嘅加斯居尼,仲自爆其實早喺2009年已經接受過英國電視台邀請,參加同類型嘅真人騷,點知當時過唔到心理測試而被拒絕,最終事隔十幾年之後,曾經效力過意甲球會拉素、喺意大利都有一定名氣嘅加斯居尼,決定參加呢個意大利版本嘅真人騷。

死性不改酒鬼想戒煙

雖然睇見加斯居尼賽前嘅說話,同埋電視台公佈嘅參賽相片,加斯居尼狀態似乎唔錯,但呢位以往踢波嗰陣已經嗜酒如命嘅前球星,接受《太陽報》獨家訪問時就自爆,曾經接受戒酒治療嘅佢又再重新飲酒:「我永遠都係酒鬼,有時都會飲番幾杯,當然唔係每日都飲,只係喺我想飲嗰時先飲,不過我知道咁樣對我身體嚟講係唔好嘅。」

雖然加斯居尼話自己有能力控制酒量,但每個醉酒佬都會話自己唔會醉!佢嘅說話未必可信喎,相信好多人都擔心,呢位名宿去到荒島會捱唔住,不過加斯居尼就話希望透過今次真人騷,改變大家對佢嘅印象:「我想放手一搏,等世人睇到真正嘅加斯居尼,英國電視台嗰邊曾經未審先判,話外界淨係想睇到鬧事嘅我,我當時堅嬲。我家吓努力學緊意大利文,希望今次野外求生可以令我曬黑啲,仲希望幫到我戒煙啦!」

包羅萬有,「體」得舒服,即Like「蘋果體育」FB專頁!
BannerBanner