求驗客手記:蘇寧缺水 中超王者江蘇停運

更新時間 (HKT): 2021.03.01 02:00

上季勇奪隊史首個中超冠軍嘅江蘇蘇寧,之前一直有傳蘇寧集團因為財困嘅關係,所以希望將旗下嘅江蘇蘇寧轉手,可惜一直都搵唔到人接手。由上年11月捧起中超冠軍,去到今年2月28號宣佈停運只係經歷咗108日,實在係令人感到欷歔。

2015年入主江蘇之後嘅蘇寧集團,曾經簽過唔少大牌球星,拉美利斯、阿歷士迪斯拿同艾達馬田斯都效力過呢隊中超隊。不過上年錄得39.1億人民幣(約46.8億港元)虧損嘅蘇寧集團,其實上季中期就有傳冇錢出糧畀球員,捧盃之後都冇派奪冠獎金,就連主席張近東早前都表明,集團未來會專注返喺零售嘅本業上面,暗示打算賣走江蘇蘇寧,蘇寧集團仲同過無錫仲有蘇州嘅兩間企業談判,但就算想低價賣盤都係冇人肯接手。

最終轉手失敗嘅江蘇蘇寧禮拜日喺微博發出聲明,提到球會停運一事:「即日起,江蘇足球俱樂部停止所屬各球隊的運營,同時在更大範圍內期待社會有識之士和企業與我們洽談後續發展事宜。」除咗江蘇蘇寧受影響之外,同樣係蘇寧集團擁有嘅意甲球隊國際米蘭都隨時受影響,有報道就話近期蘇寧集團都一直搵緊其他嘅投資者。

包羅萬有,「體」得舒服,即Like「蘋果體育」FB專頁!
BannerBanner