Goal富帥:超班前鋒收放自如捧「半大」

更新時間 (HKT): 2021.03.02 02:00

日職開咗第一輪,都開始知道各隊咩料,揭幕戰睇川崎前鋒(圖),真係激到你夭心夭肺,另外FC橫濱就唔識死字點寫,周中日本波就講呢兩隊。

點解話前鋒夭心夭肺?每一次比賽「大細」中位數去[2.5/3球]嘅時候,前鋒往往入到2:0,就自然放慢腳步,不過如果開到[3/3.5球],佢哋又真係入球不斷,玩走地真係俾佢玩死。所以今季玩前鋒,暫時都係玩盤好過玩「入球大細」,始終實力太超班,幾多球任佢哋開。星期三日職前鋒主場對住大阪櫻花,初盤就做到讓一球,以季初表現,加上兵源夠開兩隊,正副選實力都冇分別嘅情況下,上盤真係好穩,最多走盤,主隊拎三分真係冇走雞。不過「大細」中位數[2.5/3球],真係操控晒喺前鋒嘅手入面,日超盃操控到補時階段先入波擊敗大阪飛腳,所以建議喺上半場就嘗試買個「大」,隨時好似上仗咁,上半場入咗兩粒就開始嘆慢板,上半場投資落「大」比全場穩陣。

另一場推介係日聯盃,柏雷素爾主場對FC橫濱;柏雷素爾有上季神射手兼MVP奧隆加,去咗中東掘金,「入波無限大」已經唔會存在喺佢哋身上,對住呢對波只可以用穩穩陣陣去形容,主場可以放多少少心機,作客就廢事睇。不過咁,對手FC橫濱又唔係好得佢幾多,開幕戰竟然選用中村俊輔打正選,大佬呀你估家吓係旺角麥花臣東南海盃元老組咩,42歲仲係日職正選,踢攻中呢一個位置基本上係同自殺冇分別,結果都畀橫濱如願以償,作客情況下大敗畀實力一般嘅北海道。日職講求傳球速度高,中場搶截需求大,中村俊輔正選,真係教練玩佢,定係真係冇佢唔得呢,就不得而知。但家陣兩隊都冇晒方向,嚟緊呢場賽事都會採取較穩陣嘅策略,「細」在必行,不過只要橫濱唔再安排元老球員參戰,其實整體性發揮唔差,所以喺出場前留意陣容後決定落唔落橫濱下盤。

文:黃耀富

截稿前馬會尚未開盤,盤口僅供參考,讀者記得留意足智彩網頁。

資料寶藏

川崎前鋒已經跨季主場五連勝,當中攻入15球。

包羅萬有,「體」得舒服,即Like「蘋果體育」FB專頁!
BannerBanner