Goal富帥:摩納哥攻守兼備客W有「堡」

更新時間 (HKT): 2021.03.02 02:00

今個周中幾熱鬧,有聯賽有盃賽,不過始終聯賽攤路比較易捉,相反本土盃賽又要擔心戰意,又要睇臨場陣容,真係不宜大注;今次就重返法甲,周中加開快車,繼續追住愛隊摩納哥(圖),作客斯特拉斯堡都未驚過,客W可重槌。

小弟之前提過摩納哥攻力好勁,係入球「大」保證,不過近期連唔係太穩陣嘅防守都改善埋,上仗2:0擊敗比斯特,近4仗竟然有3場唔使失波,包括作客勁旅巴黎聖日耳門都贏2:0,真係攻守兼備,投注策略當然都要轉。周三摩納哥就要作客,不過基本陣容都非常完整,賓耶達、禾蘭、祖維迪等輪流踢正選前鋒,高路雲傷癒復出後亦狀態大勇,中前場大把選擇,加開周中快車都唔使驚體力問題。海外博彩公司平均值嚟講,摩納哥就1.88倍,真係唔知足智彩會開讓平/半定讓半/一,簡簡單單就大細注,重注客W,再敲埋「讓球主客和」「客勝」,博摩納哥淨勝兩球或以上,咁就更加和味。

斯軍賽前就排第15位,都仲要搶吓分護級;上場作客硬拼榜首里爾,領先到86分鐘,先俾對手逼和1:1,唔算話好差成績,不過就有啲洩氣。今次返主場作戰,但反而隊波主場戰績麻麻地,對強隊更加濕濟,對里昂、里爾、馬賽全部輸晒,今次對摩納哥就真係好難搞。

同日另一場半冷推介就敲比斯特贏一粒,比斯特主場對迪安,迪安就真係神仙難救,遙遙包尾落後護級線雙位數積分距離,近況就差到爆,連輸八場。不過比斯特又唔好叻,「讓球主客和」敲比軍贏一粒揀個「和局」啦。

文:Goal進

截稿前馬會尚未開盤,盤口僅供參考,讀者記得留意足智彩網頁。

資料寶藏

摩納哥連同盃賽錄得作客七連勝,7場累積入18球。

包羅萬有,「體」得舒服,即Like「蘋果體育」FB專頁!
BannerBanner