求驗客手記:疫苗接種順利 想獨辦歐國盃 
三獅奪冠良機

更新時間 (HKT): 2021.03.03 02:00

因武肺延遲至今夏舉行嘅2020歐國盃仲有100日就舉行,早前英媒吹風賽事有可能改由英格蘭獨力承辦,取代之前由12個國家聯合主辦嘅構思。周一英國首相約翰遜向英國《太陽報》證實,同意包晒成屆賽事嘅主辦權,如果歐洲足協(UEFA)遲啲真係將呢屆歐國盃判畀佢哋,考慮到家陣人腳都幾鼎盛,難怪英媒又吹奏三獅有機會歷史性首次喺呢項賽事封王。

英國5月可放球迷入場

英國武肺疫苗接種計劃超乎預期咁順利,直至過去周末,已經有超過2,000萬人接種首劑疫苗。英政府上周就透露,計劃由6月21日開始撤銷喺英格蘭嘅所有社交限制,而且約翰遜亦預期可以喺5月17日起畀球迷入場,所以佢今次接受訪問,就主動提出願意承辦2020歐國盃所有比賽︰「如果佢哋希望我哋主辦其他場次,我哋亦會絕對同意。」

原本2020歐國盃分別會喺12個國家嘅12個城市舉行,英國倫敦嘅溫布萊會上演包括決賽在內嘅七場波。但由於家陣歐洲疫情太嚴重,UEFA希望最好就一國搞晒,咁就唔使啲球隊周圍走,增加感染風險。

如果英格蘭成功爭取到獨力搞歐國盃,咁就會係繼1996年後再次舉辦呢項賽事。記得當時有舒利亞同加斯居尼等球星嘅英軍,賽前都俾外界睇好,可惜四強不幸輸畀嗰屆嘅冠軍德國。比起25年前,𠵱家呢隊英格蘭攻力可以講係更強,箭頭有好可靠嘅哈利卡尼,前線其他位置有人滿之患,攻擊中場有史達寧、基亞利殊同占士麥迪臣等等多功能球員,啱啱翻生嘅迪利阿里都有機會,領隊修夫基一定有排揀人。

德葡法勢阻三獅軍

雖然英軍牌面上唔錯,但大家都知唔係話你晒冷就一定有盃捧,今屆有唔少國家嘅實力都有提升。葡萄牙有大勇嘅般奴費南迪斯,2018年世盃冠軍法國亦有基利安麥巴比喺度,甚至近年有啲下滑嘅德國,教練路維啱啱暗示有意重召湯馬士梅拿等老將重整旗鼓,真係唔睇少得。

包羅萬有,「體」得舒服,即Like「蘋果體育」FB專頁!
BannerBanner