求驗客手記:巴杜美「代理人」質疑拘捕有陰謀

更新時間 (HKT): 2021.03.03 02:00

巴塞隆拿下周日就會選新會長,但佢哋嘅前會長巴杜美同法律部主管邦迪等等嘅高層,周一突然因為懷疑涉貪俾當地警方拉咗,最終喺警署過咗一晚先獲保釋,而且據講會由佢同幾位高層一齊孭晒所有操控社交網絡唱衰球員嘅責任,球會就唔會上身。身為三個會長候選人之一嘅費斯亞,就認為成件事實在太蹺,根本就係一場陰謀。

費斯亞因為上年冇參與拉巴杜美落台嘅行動,所以佢今次參選,亦俾人質疑係巴杜美嘅「代理人」,費斯亞就梗係唔認啦,仲話自己喺好多方面嘅睇法都同巴杜美唔同。佢又質疑巴杜美唔遲唔早喺會長選舉前被捕,明顯就係一個陰謀,目的就係要影響選舉結果。

至於身為今次選舉大熱門嘅前會長拿樸達,就話好擔心事件會對球會聲譽造成打擊。聽講已經諗緊方法幫巴塞翻身,其中一個方案就係向阿仙奴挖角,搵阿迪達返嚟領軍。話晒拿樸達2008年都搵過哥迪奧拿返嚟帶隊,阿迪達喺曼城做過哥帥副手,點都唔會差得去邊啩。

包羅萬有,「體」得舒服,即Like「蘋果體育」FB專頁!
BannerBanner