求驗客手記:中超崩盤 天津等散班

更新時間 (HKT): 2021.03.04 02:00

有內媒爆料,中超球隊天津泰達(圖)喺禮拜二確認咗散班,由於球隊喺限期前交唔到「工資確認表」畀中國足協,所以就肯定參加唔到今季中超賽事,好大機會同早前宣佈停擺嘅江蘇蘇寧一齊喺中超消失。

𠵱家改咗名做天津津門虎嘅天津泰達早喺2019年已經開始出現財政問題,當中包括德國外援辛度華拿同教練史泰歷克在內嘅球隊職球員更被拖糧,最後嗰兩位外援喺上年夏季先後離隊,而隊內其他職球員就被拖糧長達10個月。

內媒話,天津泰達上月底限期前都係交唔到份「工資確認表」,雖然足協方面批准將限期延長,但天津都冇再補交資料,變相放棄咗參賽資格。直到禮拜二,泰達集團決定解散球隊,據悉集團方面依然希望以體面嘅方式離開中國球壇,有意喺一定時間內還清所有欠款。

另外,上季協助江蘇蘇寧贏咗隊史首個中超冠軍嘅意大利前鋒艾達馬田斯,有傳近日接受傳媒訪問時炮轟蘇寧集團係騙子,除咗提到有拖糧情況,仲大爆一直將江蘇球員鎖喺酒店內。但隨後艾達就發聲明,話自己從來冇接受過任何訪問。

包羅萬有,「體」得舒服,即Like「蘋果體育」FB專頁!
BannerBanner