殘奧馬術|先天腦癱靠騎馬改善身體 謝佩婷、曾靝賜戰東奧係最佳禮物

更新時間 (HKT): 2021.03.06 06:00

運動面前,人人平等,殘疾人馬術盛裝舞步騎手謝佩婷和曾靝賜在地上雖受腦癱影響,不良於行,但身體障礙未有限制兩人的運動夢,他們騎上馬背自由馳騁,忘卻日常不便,昂首奔向殘奧舞台。

記者、攝影:洪量丰

謝佩婷和曾靝賜同是天涯淪落人,前者早產,出生僅重兩磅多,醫生診斷她先天腦癱,肌肉不受控制,影響四肢活動,出生後手術接手術,時常出入醫院接受復康治療;後者患痙攣性雙側麻痺,膝蓋外曲,難以平衡,而且視力不及常人。他們識於微時,全因父母期望以馬術治療改善他們的肌力和平衡力,他們三、四歲時未懂行路已學騎馬,謝佩婷指騎馬牽涉動物的不穩定因素,反有利提升身體協調,「我哋要做到人馬合一,馬有好多不穩定因素,咁樣可以幫助到身體平衡,因為我要配合佢去完成一個動作,耐力同肌力都會用到,我細個都有玩唔同嘅運動,例如羽毛球、游水,甚至籃球都有玩下,但我覺得最適合都係騎馬。」曾靝賜補充指正因每隻馬皆有不同,更能鍛練反應和身體,增強背部及大髀肌肉,「坐上去就會知道,唔係隻隻馬都做到同樣嘅動作,學騎馬時幫咗好多上身協調同埋下身嘅肌力。」

起初騎馬只為增強腳力,兩人卻在馬背上找出新天地和成功感,擺脫日常生活的殘障標籤和束縛,曾靝賜10年初披港隊戰衣,他形容當刻如夢想成真,「入到港隊當年係好開心,係一種光榮嚟,發夢都諗唔到可以入到港隊。」相較改善生理機能,騎馬同樣幫助兩人心理和社交,謝佩婷憶述年少時內向寡言,與現時樂天敢於表達分享的她大相逕庭,「以前我係一個比較內向嘅人,但係而家我識表達自己同教練去溝通,其實最享受騎馬就係唔使喺地面上受身體障礙,做到我想做嘅運動同埋動作。」

常言人馬合一,但馬術絕非外人看來騎上馬背拉扯韁繩的易事,曾靝賜笑說:「我騎馬最享受就係騎得郁隻馬,有啲馬係唔show你架。」靠鞭和腳力或能馴服馬匹,但謝佩婷認為策馬秘訣更在於溝通合作,「我哋要理解雙方的缺點同優點,動物都有脾性會發脾氣,或者特登玩吓你,做啲動作令你失平衡,咁你就要馴服佢令佢聽你話,呢樣都好有技巧。」正如謝佩婷所述,馬本屬不穩定因素,騎馬多年難免有意外,如曾靝賜在外國比賽時曾被馬匹拋下致手腕骨裂,回港後一度蒙受心理陰影;謝佩婷出戰上屆殘奧前夕又曾於英國墜馬,「我隻馬衝前然後起後腳,我成個人飛咗出嚟, 整親下背嗰下直情感覺唔到隻腳,完全郁唔到,真係好驚,差唔多成40秒冇感覺,因為撞親神經線。」不過正如他們的人生一樣,縱命途多舛,但在那裡跌倒,他們又在那裡站回來,堅毅面對,回想舊事,謝佩婷說得樂觀淡然,「初頭上返馬都會驚,不過與其胡思亂想一啲唔會發生嘅嘢,咁咪仲嘥精力,不如索性騎好啲啦。」

謝佩婷小檔案

出生日期:1996年12月22日(24歲)

習騎年齡:4歲

馬術項目:殘疾人盛裝舞步

成就:16年里約殘奧1a級第23名、15年比利時Waregem三星殘疾人盛裝舞步個人賽冠軍、12年倫敦殘奧1a級第14名

曾靝賜小檔案

出生日期:1995年2月2日(26歲)

習騎年齡:4歲

馬術項目:殘疾人盛裝舞步

成就:17年英國伯頓主教學院三星殘疾人盛裝舞步團體賽季軍

-----------------------------

《體蘋果》陪你睇波講波

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

包羅萬有,「體」得舒服,即Like「蘋果體育」FB專頁!
BannerBanner