【一燈決】燈神:巴塞夠旺上盤「拿」來

更新時間 (HKT): 2021.03.06 02:00

【名家足路】

【對決場次︰奧沙辛拿vs巴塞隆拿】

今季第二次寫《一燈決》!11月風風光光用一哥身份寫,今個月就要用燈神身份。其實2月大部份時間都喺中游,冇咩護級意識,最後一日用埋王牌都博盡做台主,結果失手之餘仲俾仙道彬過埋,時也命也。

閒話唔講咁多,3月首炮就拍住旺門球隊巴塞隆拿。唔係喎,巴塞唔係啱啱惹咗官非,前主席都俾人拉埋咩?不過呢位「大雄」其實係球員心目中嘅「技安」,主席搵網軍唱衰麾下球員咁荒謬嘅嘢都做得出,巴塞班球員一定開晒香檳,周中場西盃次回合,受害人之一嘅碧基,仲頂入一球幫球隊打入加時,最後喺加時絕殺埋西維爾入決賽,士氣咁高昂,三連勝兼冇失波嘅氣勢,邊有得擋。

一哥尊嘉就話巴塞要留力下周中作客巴黎聖日耳門嘅歐聯,不過講真,首回合已輸1:4、次回合作客贏4:0先晉到級,邊有咁多奇蹟,反而目前西甲形勢,馬德里體育會開始腳仔軟,巴塞只不過落後五分,後上奪標絕對唔係夢。而且就算有啲留力,巴塞兵源亦都係冠絕西甲,之前戰績浮沉,係教練朗奴高文仲未決定到基沙文、奧士文尼迪比利、菲臘比古天奴等擺位,而且佢又好鍾意用新星柏迪,搞到中場塞晒車,近期高文狠下決心收起基沙文,古天奴又傷埋,巴塞組織變咗簡單直接,啱晒迪比利發揮。

奧沙辛拿係就係要搶分護級,不過主場對強隊戰績就麻麻,最叻悶和皇馬,對馬體會、西維爾、貝迪斯都大敗,遇強即屈,巴塞讓一球,上盤真係大膽講句,最多走盤。

文:牽牛

《一燈決》係今季新欄目,由上月擂台盟主同上月燈神拗吓頸,睇吓讀者信邊個。

包羅萬有,「體」得舒服,即Like「蘋果體育」FB專頁!
BannerBanner