熱血隊長|懲教主任辭職創排球學校 蕭昌鴻望打波可成終身事業

更新時間 (HKT): 2021.03.09 06:00

電影《狂舞派》問大家「為咗夢想,你可以去到幾盡?」夢想有價,有人遇上困難時,會選擇向現實妥協;亦有人不忘初心,默默咬緊牙關堅持追夢。人稱「蕭將軍」的香港男子排球隊隊長蕭昌鴻更是勇字掛帥,在2019年辭去人人眼中薪高糧準的懲教主任一職,與三位合夥人創立香港專業排球學校。創業首年即遇上世紀疫症,阿蕭坦承曾覺灰心,但卻未有喪志,並盼迎難而上尋求出路。

記者:許嘉明

攝影:許嘉明、洪量丰

全港學界精英賽冠軍、大專盃冠軍、甲一聯賽冠軍,另外多次在不同賽事榮膺最有價值球員,現年28歲的蕭昌鴻在排球路上可以說是贏盡本地排壇的所有榮譽,惟香港排壇未有職業球隊,阿蕭在香港中文大學體育運動科學系畢業之時,一度站在人生路的三岔口,考慮到底應全職打球(見另文)、成為體育老師,抑或投考紀律部隊。阿蕭直言本科有不少同學選擇投考紀律部隊,當時亦覺政府部門收入穩定,故在羊群效應下投考懲教署,最終也在2018年6年順利成為懲教主任。

不過,在懲教院所需要輪班,阿蕭不時通宵工作後趕去練習,令他的狀態大受影響,加上在懲教院所不能與外界聯絡,也讓他有感跟排球這項運動日漸疏離,「我咁鍾意打波,都會好多時候好唔想去練波,因為精神同肉體都好疲累。」他表示並非不喜歡懲教工作,但也不禁反思到底這是否自己想要的生活,「究竟如果我繼續做落去,我會唔會好快就離開呢個運動呢?我相信絕對會,所以去到一個位,我就覺得我都係想做一啲排球相關嘅(工作)。即使有可能失敗,但至少我老咗之後唔會後悔。因為真係試咗、唔得,自己會心息,然後好安份咁去做返份排球相關又好,或者可能好穩定嘅工作。」

於是阿蕭在2019年8月毅然捨棄公務員的「鐵飯碗」,他憶起遞信給上司一刻,就如人生轉捩點:「我相信呢個決定係好重要,係人生一個好大嘅決定同轉捩點,影響我將來成個事業嘅發展,或者人生嘅路。」阿蕭隨後即着手籌辦香港首間排球學校,他笑言華英中學老師周國傑對自己影響甚深,自己亦盼仿傚恩師以排球作為媒介,令後輩在一個健康的環境中成長。

武漢肺炎去年初在港爆發,「封場」及限聚令等措施重創體育業界,阿蕭透露在疫情初期難免灰心,而且一直充實的生活,突然變得空白一片,更教他感到迷茫,「我都係正常人,嗰時都會諗埋一邊。以前喺懲教署、啱啱開排球學校都好忙,但係突然間咩都停晒,唔知有咩可以做,或者有咩要做。嗰段時間真係要不斷調整自己心態,諗多啲正面嘅嘢,或者認真思考吓,究竟呢段時間自己可以做啲咩,或者係排球學校可以做啲咩,然後就開始慢慢適應咗。」

為了尋求出路,阿蕭努力裝備自身,他有感在疫情下難以維持體能,因此決定將辦公室一半空間改裝成健身室,阿蕭由徒手的帶氧訓練,到添置啞鈴、阻力橡筋,再訂購重訓托架等器材,「我哋一開始喺呢個空間打排球,但係打打吓就覺得呢度樓底唔夠高,又好易打爛嘢,對於我哋體能嘅幫助又唔係好大,咁就搵一啲健身器材返嚟。」阿蕭發現自己對健身大感興趣,空閒時間也不斷看書和參考網上短片,再為自己設訂體能訓練菜單,為本地球季重開做好準備。

此外,阿蕭為排球學校開設網上商店,也嘗試在YouTube開設頻道,邀請鄧麗欣等不同嘉賓參與清談節目《友排傾》,希望提高城間對排球的興趣。他也埸藉機請教林大輝中學男排的學生「波仔」黃浚銘關於拍片及剪接的技巧,並笑言意外發掘到新興趣,「以前大部份嘅時間都擺喺打波同讀書,或者係以前嘅工作之上,其實都冇乜機會發掘其他嘅興趣。喺疫情底下,自己多咗好多時間,亦都有機會可以嘗試拍一啲唔同嘅短片。我以前有個學生本身都YouTuber,佢一教咗我啲剪接之後,我就好有興趣,然後就好雀躍咁幫排球學校剪片。」

第四波疫情在上月終於放緩,本港的體育場所亦陸續重開,排球學校也於三月復課。阿蕭感激一班學生及家長的支持,讓排球學校得以捱過這段艱難時刻,「課堂又停又開,不論喺室外上堂又好、限聚令下小班教學又好,佢哋都好支持我哋,願意參加訓練班,跟我學打波。其實呢一年以嚟,真係好靠佢哋幫助我哋捱過去。」香港專業排球學校的學生來源,主要分成12歲或以下和成人班,由於坊間少有供成人學打排球的地方,故排球學校創立初期,亦有不少人慕名報讀。學員Happy在兩年前初學排球,29歲的她更是創校以來首批學生,「我學打排球時,蕭sir仲未開學校,但我有睇會長盃同甲一聯賽,已經覺得佢好勁。外界稱佢為「香港第一大槌」,所以都想跟佢學打波。」成人班不分男女,而Happy所在的進階班共有十多人,但阿蕭教班時會仔細教導所有學生,亦會定下如分組比賽中,三傳之中必須有女生觸球的規矩,讓所有人都可以參與其中,Happy感激阿蕭傾囊相授,讓自己進步良多。

在逆境之中,阿蕭也無悔追夢,他指過往排球生涯一帆風順,現時遇到挑戰,更要樂觀面對,「即使好多舊同事同親朋好友都會擔心我,覺得我唔好彩,啱啱開辦學校就遇到疫情,而且仲差唔多年幾兩年咁長時間。但係我調返轉頭諗,雖然遇到疫情一定唔係好事,但比起一啲已經開辦咗好耐嘅體育學校,其實我哋相對成本都唔係好大,影響都算係最輕微,總算不幸中嘅大幸。」早前電視劇《男排女將》令港人開始關注香港男排,阿蕭盼疫情過後,大眾有更多機會接觸排球,「《男排女將》令香港人對男排改觀,原來男仔打排球都可以好熱血,已經唔再停留喺人妖打排球嘅年代。」

蕭昌鴻小檔案

出生日期:26/01/1993(28歲)

身高:190 cm

扣球點:330 cm

攔網點:320 cm

位置:主攻手

效力球會:少龍(2004至11)、青龍(11至13)、龍隊(14至今)

學歷:香港中文大學體育運動科學系

教練資格:香港排球總會本地一級排球教練

主要榮譽

全港學界精英排球賽:冠軍、最有價值球員、最佳攔網、最佳扣球、最佳一傳(2011/12)

中銀紫荊盃:傑出排球及沙灘排球運動員(2011/12)

大專盃:冠軍(2013/14、14/15)

會長盃排球邀請賽:冠軍(2015至18)

全港公開排球錦標賽(甲一組):冠軍(2018、19)

-----------------------------

《體蘋果》陪你睇波講波

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

包羅萬有,「體」得舒服,即Like「蘋果體育」FB專頁!
BannerBanner