Goal富帥:川崎前鋒「大」乜都「德」

更新時間 (HKT): 2021.03.09 02:00

上星期重心日職川崎前鋒(圖),作客都贏到開巷,狂勝仙台維加泰5:1,三笘薰、李安度達美奧,講前鋒有幾勁,簡單直接講呢兩條友已經夠晒照;三笘薰, 川崎自家製青訓產品, 23歲仔,左右腳都擅於盤扭射門,2019年到𠵱家入咗成20球,由U12慢慢育成到今日,睇個勢未來1、2季都會出國搵食。

真係要讚日本球隊對年輕球員嘅培訓,又俾足佢哋有上位機會,其實佢上季聯賽已經踢到識飛,不過關鍵決定爭啲火喉,今季漸見成熟,將來國家隊必然見到佢嘅身影,難得上仗休息打後備,最後10幾分鐘先落場,今場有排爆。李安度達美奧,正前鋒,真貨巴西國腳,名氣雖然唔講得好大,但真係場場比賽都有入波,所以級數比其他外援高一班,佢主要作用係禁區外停波,回傳俾其他隊友,然後再搵機會射門,有呢兩條友壓陣,邊隊夠佢哋踢?星期三前鋒返主場對住德島漩渦,「主勝」、入球「大」、半場「大」、角球「大」統統要晒。

另一場日職大阪飛腳主場對大分三神,飛腳今季一開閘就脫腳,連埋日超盃已經連輸兩場,比起上季叫做執過吓陣容,但實力都係麻麻,再加埋隊中有人中武肺,上仗對名古屋鯨魚已經取消,球員基本日常練習、生活有一定影響。

大分喺日職開季未輸過,第一埸差啲爆冷輸畀德島漩渦,好彩頂得住逼和1:1,上場對FC橫濱感覺攞番節奏,今場對住多事之秋嘅飛腳,受讓平/半已經好筍,有信心作客小勝,客W加埋「細」啦!

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner