求驗客手記:夏維斯代表作 華拿俾杜曹鬧 
車仔孖寶冇「德」比

更新時間 (HKT): 2021.03.10 02:00

杜曹帶領嘅車路士繼續保持不敗身!禮拜一英超有2場關乎前4席位嘅大戰,其中車路士喺主場對愛華頓,德國中場夏維斯踢出加盟車仔後嘅代表作,造成對方球員擺烏龍同博得12碼,幫車仔兩球搞掂拖肥糖,反而佢嘅同胞迪姆華拿繼續冇波入,仲要俾杜曹喺場邊鬧。雖然車仔贏波後保得住第四,但身後嘅韋斯咸同日亦以兩球擊敗列斯聯,賽後只落後車仔2分但踢少1場,來屆歐聯資格席位仲有排爭。

對比起上禮拜四1:0擊敗利物浦嘅正選陣,杜曹今場換咗五個人,其中德國孖寶夏維斯同華拿齊齊正選,不過開賽初段藍戰士有啲老鼠拉龜,迪姆華拿仲喺上半場25分鐘左右,俾杜曹喺場邊用德文大聲呼喝:「迪姆!你想喺左邊留幾耐呀?你係踢右邊㗎,你已經留咗喺左邊成15分鐘啦,你到底明唔明㗎?」

手機用戶請按此放大圖表

夏維斯有兩次貢獻食「糖」

結果迪姆華拿同赫臣奧杜爾調位後,後者立即喺31分鐘由左路策動攻勢,直線傳畀馬高斯阿朗素,後者隨即傳中,夏維斯近門撞射,個波省中愛華頓後衞賓葛菲特入網,結果車仔就憑呢球烏龍波半場領先。換邊後夏維斯曾經喺禁區內控低個波轉身抽入,點知VAR話佢手球在先唔計算。再去到65分鐘,表現活躍嘅夏維斯單刀喺禁區內俾比克福特撲跌,佐真奴費路射入12碼幫車仔領先至兩球。

之後迪姆華拿亦都喺右路有單刀機會,不過同人唔同命,佢全場三次起腳,連同呢腳在內有兩次都俾比克福特救出,車路士最終都贏兩球完場,領隊杜曹更加錄得各項賽事11場不敗,仲成為首位喺英超帶隊頭五戰主場都冇失波嘅領隊,𠵱家呢隊車路士明顯比起林柏特教嗰陣穩陣得多。

連美斯建功韋斯咸追「車」

賽後杜曹就話:「我哋值得贏嘅,上半場雖然好難踢,但我哋完全取得控制權,下半場我哋水準提升後,仲製造咗好多威脅。」對於再次零封對手,杜曹就話要歸功於團隊合作:「我哋唔失波係應得嘅,我當然為門將同後衞高興,但同時亦為全隊高興,因為所有人都有付出努力。」

賽後車仔雖然已經九場英超不敗,28戰積50分排喺第4位,但同日韋斯咸喺主場靠「連美斯」連格同奇治戴臣各建一功,同樣以2:0擊敗列斯聯升上第5位,追到同車仔爭2分仲要踢少1場,愛華頓同熱刺本身亦唔係落後太多,睇落前四爭奪分分鐘仲刺激過爭冠。

包羅萬有,「體」得舒服,即Like「蘋果體育」FB專頁!
BannerBanner