【一燈決】一哥:史浩克冇心護級等「狼」咬

更新時間 (HKT): 2021.03.13 02:00

【名家足路】

【對決場次︰禾夫斯堡vs史浩克04】

上個禮拜首次用一哥身份推介,結果奧沙辛拿真係頂唔住,就算巴塞隆拿喺西班牙盃4強踢足120分鐘,之後又要應付歐聯都照贏兩粒,呢場波畀到小弟一個教訓,有時候實力上嘅分野,真係未必可以靠鬥志彌補。今個禮拜轉玩德甲,一於推介三哥禾夫斯堡(圖),主場可以輕鬆搞掂包尾嘅史浩克04,開出上盤。

兩軍今季嘅表現,相信喺聯賽榜已經反映到晒,一隊係力壓利華古遜、多蒙特排第三嘅狼堡,另一隊就踢咗成年聯賽先贏過一場、今季換咗成五位教練仲排緊喺包尾嘅史浩克,今場優劣其實相當明顯。狼堡雖然兩連敗,但對手係實力分子RB萊比錫同賀芬咸,輸波都算情有可原,要保住來屆歐聯席位,狼堡今仗唔反彈等幾時先?

另一睇好狼堡嘅原因,係對手史浩克真係唔爭氣,今季喺聯賽對住頭六位球隊,場場都輸兩球或以上,就算冬窗搵嚟一大班所謂救兵,教練一換再換都冇乜起色。上個禮拜新帥加莫斯上任,話就話喺主場成功守和緬恩斯,但對手只係排德甲尾二,同你咁高咁大,你仲要俾對手全場射足19腳,自己喺主場先射得兩次,只係緬恩斯把握力曳先贏唔到。

講真,如果有心護級就應該好似西布朗咁,請艾拿迪斯之類嘅護級專家搏吓,從史浩克揀個德乙教練加莫斯開始,都睇得出呢隊波等緊降班,鋪定路下季喺德乙點翻身。今仗作客求反底、如狼似虎嘅狼堡,史浩克俾人射少腳都當贏喇,狼堡讓一球/球半撐上盤喇!

文:尊嘉

《一燈決》係今季新欄目,由上月擂台盟主同上月燈神拗吓頸,睇吓讀者信邊個。

包羅萬有,「體」得舒服,即Like「蘋果體育」FB專頁!
BannerBanner