Goal富帥:信鳥棲砂岩兄弟班 「柏」住上

更新時間 (HKT): 2021.03.16 02:00

今季日職開「咧」幾周都尚算正路,唔少實力分子都已經排晒前列,「大細」盤路都算易捉,好似上星期同大家分享嘅「升班馬」大戰,福岡黃蜂就2:1反勝德島漩渦,中下游球隊都算多波入。周三日職又有一輪快車,今次重心唔玩名牌球隊住,轉攻一隊大家覺得差,不過有驚喜嘅球隊:鳥棲砂岩(圖)。

鳥棲砂岩對香港球迷最大印象,係前兩季引入前利物浦、車路士射手費蘭度托利斯,結果失敗而回,搞到差啲降班。但上季季尾開始球隊就有好大嘅轉變,新季4戰拎到3勝1和,排喺頭三位。球隊炒左費卡丹迪,提升U18教練金明輝係轉捩點,因為人腳上基本冇乜變動,但係就帶到隊波夠晒整體,山下敬大、酒井宣福等主力唔係大名氣,不過實而不華,兄弟班咁慢慢打上嚟。今次主場對住柏雷素爾,柏市冇咗上季MVP,再唔係入球機器,4場波入得2粒,今次作客對鳥棲,只求死守,我信鳥棲可以贏波,平手盤揀主隊,再貼埋入球「細」。

頭先講開費卡丹迪,其實呢個意大利籍教練,就去咗名古屋鯨魚,新一季都係默默起革命,穩穩陣陣做到二哥,挑戰川崎前鋒霸業。鯨魚之前幾場就好似意大利作風,穩穩陣陣贏少少,成日贏1:0,睇到人都悶,球員嚟講我最鍾意吉田豐,夠晒球味。不過咁,周三就主場對FC橫濱,講防守FC橫濱真係日職最差幾隊之一,初盤鯨魚讓到一球,唔信佢哋又玩1:0戰術,大炒一場有得諗,上盤加「大」啦。

文:Goal進

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner