Goal富帥:西維爾專注聯賽 勢大炒報仇

更新時間 (HKT): 2021.03.16 02:00

上個周末就叫大家留意兼顧歐洲賽球隊,呢期聯賽可以追對家,今次就轉個角度,追捧一啲已經喺歐洲賽出局嘅球隊,專注聯賽之後可以追落後;星期三西甲補賽,西維爾(圖)主場對艾爾切,西維爾歐聯出局後,終於喺聯賽反底,打吡戰贏貝迪斯,今次繼續主場,面對防守麻麻嘅艾軍,上盤穩陣。

計實力,西甲三強馬德里體育會、巴塞隆拿同皇家馬德里之後,應該都數到西維爾。不過之前就衰貪心,分途出戰西盃同歐聯,搞到聯賽接連失分。兩個盃賽都相繼出局,西維爾都要專心返聯賽保前四。上仗佢哋就即時反底,打吡戰小勝貝迪斯,終止兩連敗,周中補賽就會對艾爾切。呢個戲碼係唔係好熟面口?無錯,2隊3月頭先對過嚟,因為比賽夾喺西盃同歐聯中間,西維爾筋疲力盡,結果以1:2輸波,今次西維爾重上正軌,點都有仇報仇。

呢場波海外莊家都開得幾辣,西維爾主W得1.36倍,亞洲盤就讓一球/球半,上盤要贏兩球先收,不過近期西維爾讓一球/球半都幾醒神,之前主場對卡迪斯同華倫西亞都讓呢個盤口,亦都以3:0大勝,今次可以追。艾爾切就要搶分護級,其實上仗作客皇馬踢得唔錯,先入一球之下,最終補時階段俾賓施馬絕殺,以1:2飲恨,相信對士氣都好大影響。加上作客已經連輸五場,連續作客亦都蝕底,睇嚟都係大敗而回。

俄超卡洛斯達同西維爾差唔多背景,歐霸盃出局後,上仗終於反底大勝FC坦波夫,周四就主場對莫斯科戴拿模,兩隊都係中游,卡軍主場就可靠好多,讓平/半要埋上盤。

文:Goal進

包羅萬有,「體」得舒服,即Like「蘋果體育」FB專頁!
BannerBanner