【一燈決】燈神:方辛加帶羅馬手到「拿」來

更新時間 (HKT): 2021.03.20 02:00

【名家足路】

【對決場次︰羅馬vs拿玻里】

有時揀弱勢球隊博反彈,真係一殼眼淚,上星期諗住史浩克04換帥後有起色,結果就輸夠五粒,俾尊嘉追成1:1,無話可說。今次《一燈決》揀咗羅馬主場對拿玻里,兩隊近況都唔錯,強強交手我就偏好羅馬多啲。

呢個世界真係冇咩係永遠嘅強,永遠嘅弱;好似香港扭曲晒嘅電視產業,一台獨大呢個情況都大大話話十幾年,贏得多贏到慣,自己就不思進取,有幾多人好似C朗咁自律呀,結果出品就越嚟越差。最近換咗獎門人做高層又係得啖笑,轉吓劇集出街時間,就自以為摩連奴咁排個靚陣,結果咪又係輸波。摩連奴近年已經俾人笑食老本,泊大巴玩防反已經不合時宜,獎門人同樣都係out到爆,除咗識翻炒,真係睇唔出佢有咩高招,睇埋大台都一步步衰落。

唔單止電視台,一隊波有好嘅教練都好緊要;羅馬同拿玻里兩隊教練都係球員出身,亦都算實而不華。羅馬嘅方辛加嚟自葡萄牙,踢波嗰陣名氣唔大,教波都唔係一步登天,先前教波圖、薩克達等累積經驗,前年開始帶羅馬,都叫幫呢支首都球隊穩定戰績。歐霸盃冇咩驚險下晉級,家陣就放返注意力去聯賽爭前四,聯賽主場戰績僅次於國際米蘭,成季只輸過一場,平手盤點都穩陣。

拿玻里教練加度素就大名得多,教波水準亦飄忽好多,上圈歐霸盃已經出局,形勢就較有利,不過聯賽作客強隊戰績亦麻麻,輸晒畀國際米蘭、阿特蘭大、拉素,上場贏傷兵滿營嘅米蘭,反映唔到實力,要唔過。

文:牽牛

《一燈決》係今季新欄目,由上月擂台盟主同上月燈神拗吓頸,睇吓讀者信邊個。