田徑|未決定是否打疫苗 呂麗瑤奧運夢順其自然

更新時間 (HKT): 2021.03.20 16:58

東京奧運將於七月底開賽,跨欄運動員呂麗瑤雖時間未達入圍門檻,但仍有機會靠排名奪入場券,她坦言靠排名爭入圍較被動,只能做好自己,順其自然,她指港隊總教練表示奧運前會安排她出外比賽,惟未落實計劃,因此暫未決定是否接種武漢肺炎疫苗。

呂麗瑤今日(周六)於測試賽出戰主項100米跨欄,結果跑出13秒63,雖與個人最佳13秒32有距離,但她認為以開季水平而言屬不錯,又透露今年將出外比賽,但地點尚待教練安排,變數眾多,故未決定打疫苗,「有好多因素影響,例如入境同隔離,又睇緊歐盟會唔會出疫苗護照,但可能有好多條件,所以好難呢一刻決定到,係會考慮嘅,都係煮到埋嚟先算啦,而家十劃都未有一撇。」今屆奧運女子100米跨欄共設40席,撇除廿多位達入圍門檻12秒84的運動員後,尚餘席位會以世界排名分配,世界排名103的呂麗瑤指未有多留意奧運席位,會盡力而為,「係有機會嘅,但好多嘢都控制唔到,做好自己先。」

男子組方面,受大腿肌肉斷裂困擾多時的張宏峰自19年4月後再次踏足賽場,他於110米跨欄跑14秒28力壓對手,他賽後指時間比練習慢,「條氣唔係好順」,笑說下周出戰系列賽要復仇。全運會及亞運會將於今年下旬及明年舉行,張宏峰上屆亞運前夕因傷缺戰,他憶述當年壓力極大,受傷塞翁失馬,反予他空間調整心理,「18年亞運傷咗無出比出咗好,當年越嚟越大壓力,我練得唔好,就算出到都包尾,咁樣無意思,嗰陣有段時期行路、瞓覺都諗點樣可以跑好啲,又緊張又頹廢,之後無得練就調整咗心態,睇開咗好多。」他續指疫情下見步行步,不會多想能否代表港隊出征,「我會想做好今年先,始終下年嘅事大家都唔知係點。」

欄以外,石錦程和林穎彤分別膺男、女子百米飛人,前者跑10秒63,後者則跑12秒51。

-----------------------------

《體蘋果》陪你睇波講波

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

包羅萬有,「體」得舒服,即Like「蘋果體育」FB專頁!
BannerBanner