【一燈決】一哥:拿玻里爆發小宇宙去「馬」

更新時間 (HKT): 2021.03.20 02:00

【名家足路】

【對決場次︰羅馬vs拿玻里】

上星期推介大家要史浩克04對家,結果禾夫斯堡果然贏足五球,今個禮拜一於食住個勢,介紹大家禮拜日有場意甲大戰,羅馬主場鬥拿玻里。筆者一向對方辛加帶領嘅羅馬唔睇好,特別佢哋踢大戰能力認真麻麻,反而拿玻里連接喺意盃同歐霸出局、教練加度素面臨被炒之際,又可以發揮出打不死嘅小宇宙,近4場聯賽贏足3場,包括上個禮拜作客搞掂AC米蘭,正所謂寧買當頭起,平手盤梗係要拿玻里。

其實筆者覺得拿玻里呢隊波實力唔曳,高列巴尼、恩斯治尼等質素唔錯,要贏佢哋其實唔易。不過呢隊波衰在唔穩定,1月試過炒完費倫天拿6粒,轉個頭又會輸畀維羅納,搞到教練加度素之前一度陷入帥位危機。好在近期喺傷兵梅頓斯、迪亞高迪美、希沙積等主將復出之下,終於踢出兩連勝走勢,賽前距離排第4嘅阿特蘭大只差2分,加度素肯定想保持上仗贏AC米蘭嘅氣勢。

另一睇好拿玻里嘅原因,係羅馬呢隊波真係幫唔落,踢咗大半季對住聯賽榜排前八位嘅球隊,竟然一場都未贏過,首循環仲要俾拿玻里炒過四蛋。羅渣伊賓尼斯、甘貝拿等羅馬後防球員明顯未夠班,踢大戰成日慌失失之餘,上仗聯賽對住17場不勝嘅帕爾馬,都可以輸兩粒。加上射手迪斯高同方辛加鬧不和之後,進攻基本上只靠米希達利恩,未必攻得入拿玻里防線;而且佢哋啱啱周中踢完歐霸盃,體力上點都有啲消耗,今仗梗係捧狀態較佳、心理上又贏晒嘅拿玻里喇!

文:尊嘉

《一燈決》係今季新欄目,由上月擂台盟主同上月燈神拗吓頸,睇吓讀者信邊個。

包羅萬有,「體」得舒服,即Like「蘋果體育」FB專頁!
BannerBanner