Goal富帥:勝利不設防捧鳳凰

更新時間 (HKT): 2021.03.23 02:00

上周末推介神戶勝利船真係一身汗,輸3球都可以反勝4:3,有時賭日本波有呢度好,日本球員普遍都幾好鬥志,大比分落後都會繼續逼搶,可能佢哋都睇得《足球小將》多,「球證一日未吹雞都唔好放棄」。相反澳洲人就真係冇咁好鬥心,尤其係墨爾本勝利,一失波就好似決堤咁,好似之前嗰場對墨爾本城咁,周中澳職點可以唔買勝利對手。

周三就有兩場澳職,頭場威靈頓鳳凰(圖)就主場對勝利,初盤鳳凰就讓緊半/一,其實再讓多啲都唔驚。勝利完全冇贏波能力,前線又冇尖刀,長期處於捱打狀態,班後衞已經唔穩陣,一失守就好快散。鳳凰係我今季較喜愛嘅澳職球隊,風格上同一般澳職兵好唔同,中前場組織能力強,傳送爽朗明快,入球能力亦都唔錯,之前兩場喺領先之下畀對手追番,甚至輸埋,其實只係遇上硬淨對手,有啲格食格,今次勝利冇咁硬,鳳凰大炒格,信心飛捧上盤。

另一場珀斯光輝主場對FC悉尼,其實我都幾鍾意光輝踢法,攻力都相當唔錯,有一對高佬科拿路利同安迪基奧治做柱躉,迪亞高卡斯度又交到靚波,可惜後防真係唔穩,前面入埋唔夠後面輸,入1球失2球真係好難搞,富二代都畀你揸乾,搞到近4戰只拎到1分。FC悉尼慢慢重拾正軌,呢隊波最叻控制節奏,大勝就未必得㗎喇,不過作客只係讓平/半;「入球大細」方面,光輝都似主場入到波,補埋個「大」就最穩陣。

文:Goal進

截稿前馬會尚未開盤,盤口僅供參考,讀者記得留意足智彩網頁。

資料寶藏:

墨爾本勝利4場作客1和3負只得1分,是澳職作客最差球隊。

包羅萬有,「體」得舒服,即Like「蘋果體育」FB專頁!
BannerBanner