求驗客手記:兩大球王鬥刷新紀錄 
C朗燒鬚 美斯剃「蘇」

更新時間 (HKT): 2021.03.23 02:00

手機用戶請按此放大圖表

基斯坦奴朗拿度(C朗)同美斯雖然已經唔再喺同一聯賽角逐,不過兩位球王就繼續狂破紀錄。C朗早前就射入個人職業生涯第770球,可惜祖雲達斯周日失威,主場爆大冷一球不敵「升班馬」賓尼雲圖。美斯就威威,喺周日除咗打破前隊友沙維喺巴塞隆拿嘅上陣紀錄,仲成為喺單一聯賽入球最多嘅球員,佢帶領巴塞6:1狂數皇家蘇斯達,繼續力追榜首馬德里體育會。

C朗今季喺意甲繼續勇猛,至今已經攻入23球喺射手榜領先。呢位36歲前鋒喺前一輪作客卡利亞里就連中三元,攻入佢球會同國家隊加埋嘅第770球,仲打破埋球王比利嘅正式賽事入球紀錄。

C朗收衫 祖記爆冷輸波

喺星期日祖雲達斯對賓尼雲圖賽前,C朗就獲球會主席阿涅利送上一件印有「770」同「GOAT(史上最偉大球員)」嘅球衣,表揚佢嘅成就。不過C朗今場就未能夠增添入球,仲老貓燒鬚喺比賽中連番失機,最終祖記仲以0:1輸波,四連勝斷纜。賽後得55分繼續排意甲第4,但已經落後榜首國際米蘭10分,要衞冕意甲相當困難,再唔踢番好啲隨時連前四都不保,事關拿玻里已殺到上第五,只差祖記兩分。

C朗自2018年加盟祖記後,至今已經為球隊喺各項賽事攻入95球,不過祖記始終冇辦法靠呢位葡萄牙射手一圓歐聯冠軍夢。C朗同祖記嘅合約喺明夏屆滿,有傳皇家馬德里就希望收購C朗回巢,不過祖記體育總監柏拉迪斯就講明唔打算放人:「我哋會留住C朗,佢將會繼續為我哋效力。」

美斯起孖兼破沙維上陣紀錄

另邊廂,C朗老對手美斯亦都繼續破紀錄,喺周日作客皇蘇嘅西甲第768次為巴塞上陣,打破佢前隊友沙維嘅紀錄,成為巴塞史上上陣次數最多球員。美斯今場亦繼續有好表現,交出2入球1助攻,助巴塞大勝皇蘇6:1,佢仲以467個西甲入球成為咗史上喺歐洲單一聯賽入球最多嘅球員。賽後巴塞以62分排西甲第2,落後榜首馬體會四分,雖然巴塞季初表現唔係咁好,又喺歐聯出局,不過球隊依然係歐洲5大聯賽唯一一隊喺2021年聯賽仲保持不敗嘅球隊,絕對有機會追趕馬體會。

包羅萬有,「體」得舒服,即Like「蘋果體育」FB專頁!
BannerBanner