求驗客手記:巴利完季返艦BBC再現?

更新時間 (HKT): 2021.03.25 02:00
■巴利(箭嘴示)心入面盤算緊啲乜就冇人知,不過為國效力絕對係佢至愛。互聯網

家吓正喺威爾斯國家隊備戰世盃外嘅翼鋒加里夫巴利,今季由皇馬外借到熱刺,近排表現仲「弗」到漏,不過呢位31歲威爾斯隊長喺新聞發佈會上就話,自己計劃喺球季完咗之後返番皇馬,完成同「銀河艦隊」之間周薪高達650萬歐元(約6,000萬港元)嘅合約:「我認為我今年嚟熱刺嘅主要原因係可以喺呢度踢到波,然後用好啲嘅狀態參加歐國盃。最初嘅計劃係喺熱刺踢一季,歐國盃之後我同皇馬仲有一年合約,所以我嘅計劃係返番皇馬,呢個一直係我嘅計劃。」有傳皇馬一直想收購多蒙特前鋒艾寧夏蘭特,但如果買唔到就會諗辦法邀基斯坦奴朗拿度(C朗)回巢,話唔定當日最強「BBC組合」又會重聚。至於近期戰績麻麻、之前仲喺歐霸盃意外出局嘅熱刺,巴利就認為國際賽期嚟得啱啱好:「我一直認為,當球會嘅事情發展得並唔順利嗰陣,最好就係離開一段時間,咁會對我有幫助。家吓我哋要做嘅就係將注意力集中喺威爾斯嘅比賽上面,忘記球會嘅生活。」

包羅萬有,「體」得舒服,即Like「蘋果體育」FB專頁!
BannerBanner