求驗客手記:喀國寄錯電郵 祖普莫亭落選

更新時間 (HKT): 2021.03.25 02:00

喺國際賽期出戰非國盃外圍賽嘅喀麥隆,之前公佈嘅大軍名單入面竟然冇拜仁慕尼黑前鋒祖普莫亭(圖中),據外媒報道,原來呢位32歲前鋒之所以落選,係因為喀麥隆足總填錯電郵地址!之前喀麥隆教練干斯卡奧話過,因為祖普莫亭冇覆過電郵,所以將呢位拜仁前鋒排除在外。但其實原本喀麥隆足總要向球員同埋效力球會寄出邀請電郵嗰陣,佢哋竟然將呢封邀請信寄錯咗畀自己,所以祖普莫亭同拜仁自然就唔知喀麥隆徵召球員。雖然喀麥隆已經提早出線,不過祖普莫亭錯失為國效力嘅機會,佢老竇兼經理人就公開炮轟:「佢哋勁唔專業囉!你起碼要寄去正確嘅地址吖!」

包羅萬有,「體」得舒服,即Like「蘋果體育」FB專頁!
BannerBanner