Goal富帥:信塞爾維亞「葡」得起

更新時間 (HKT): 2021.03.26 02:00

周中國際賽重心冇令大家失望,比利時3:1擊敗威爾斯,順利開出[-1]「主勝」;不過又唔係支支強隊都掂,荷蘭就爆冷輸畀土耳其,法國主場都俾烏克蘭逼和,嚟到第二輪國際賽,大家都要小心啲,唔好盲目高追強隊。

塞爾維亞失落今夏歐國盃決賽周資格,今個月開始就搵史杜高域(圖)接任教練。有一定波齡球迷,都記得呢個踢過鯨魚嘅中場瀟灑哥,佢退休後集中教亞洲球隊,包括鯨魚同中超廣州富力。史杜高域喺國家隊都夠晒威名,始終要帶一支幾個人化、又紀律性唔強嘅球隊,真係要有咁上下權威先鎮得住個場,史杜高域首戰都拎到頭彩,3:2險勝愛爾蘭,星期六就繼續主場出擊,面對葡萄牙。葡萄牙一定會讓波,世界博彩公司平均值開到客勝1.7倍,作客要讓到半/一,冇理由唔要下盤啦。

葡萄牙係就係有基斯坦奴朗拿度同般奴費南迪斯等一大班球星,不過第一場都只係小勝阿塞拜疆,仲要靠對手擺烏龍先入到波。葡萄牙以前對塞爾維亞3勝3和,都只不過五成勝率,我就信塞軍主場不敗。

上仗樣衰輸波嘅荷蘭,周六就返主場對拉脫維亞,唔使多講一定急攻求反底,不過後防又唔穩陣,博入球「大」一定好過上盤。

文:Goal進

截稿前馬會尚未開盤,盤口僅供參考,讀者記得留意足智彩網頁。

資料寶藏

塞爾維亞近5場主場取得3勝1和1負,包括上年5:0大破俄羅斯。

包羅萬有,「體」得舒服,即Like「蘋果體育」FB專頁!
BannerBanner