【一燈決】一哥:捧斯國下盤打大灰狼

更新時間 (HKT): 2021.03.27 02:00

【名家足路】

【對決場次︰俄羅斯vs斯洛文尼亞】

上星期推介拿玻里作客搞掂羅馬順利命中,嚟到最後一期嘅《一燈決》,撞着筆者最鍾意賭嘅國際賽,遇上中國老友俄羅斯主場出擊,一於撐吓對手斯洛文尼亞呢支中歐小國,作客頂得住俄國呢隻大灰狼!

俄羅斯貴為2018年世界盃主辦國,當年就好似中國2008年搞奧運一樣,唔可以失威之下將隊波谷到好盡,靠住伊拿舒域治、艾堅菲夫等老將咬埋最後一啖氣,成功殺入八強,錄得俄國近年嚟世界盃嘅最佳成績,都叫有晒交代囉!正如中國喺2008年奧運谷到盡拎到破紀錄嘅48面金牌一樣,四年之後嘅倫敦奧運表現明顯有所回落,2016年里約奧運更加得番26面金牌,仲衰過2000年嘅悉尼奧運。

所以筆者相信同中國一樣由共產黨領導嘅俄羅斯,完成咗2018年主辦世界盃嘅國家級任務之後,表現肯定會滑落。事實上,俄羅斯近年喺國際體壇嘅聲譽都下滑緊,仲因為禁藥問題禁止參加東京奧運,足球隊亦出現青黃不接,得番32歲嘅中鋒迪斯尤巴孭飛,昔日沙皇迪沙高耶夫近年踢到影都冇,當年世盃新星高路雲只係曇花一現,西甲球星卓利舒夫又因傷缺陣,仲要選埋已經37歲嘅施哥夫嚟頂。

睇嚟俄佬今鋪都未必攻得入對手,事關斯洛文尼亞由馬體里體育會門神奧比歷把守大門,球隊狀態仲要好好,自從2020年起一直冇輸過,上仗更加以1:0搞掂世界盃亞軍克羅地亞,今仗點會驚實力更差嘅俄佬,斯洛文尼亞今場受讓半/一,下盤捧得過!

文:尊嘉

由2021年4月起,《一燈決》欄目取消,未來會公佈取代欄目。

包羅萬有,「體」得舒服,即Like「蘋果體育」FB專頁!
BannerBanner