求驗客手記:踢完非國盃提早返倫敦變髮 
美揚火雲邪神look炒車

更新時間 (HKT): 2021.03.28 02:00

要數阿仙奴隊內有咩潮人,不外乎得兩個揀,一個係曾經喺巴黎時裝周代表LV行過天橋騷嘅比利連,另一個就係經常晒吓名車同潮牌裝飾嘅奧巴美揚。

今日要講嘅就係美揚,佢喺呢段國際賽期間唔使好似班隊友踢得咁頻密,只要幫加蓬喺上周四鬥完剛果民主共和國場非國盃外圍賽後,就可以返倫敦,原因係之後場波嘅對手安哥拉,俾英國列入疫情不安全國家名單裏面,所以佢獲准提早離隊;可能見得閒,就走去搞搞個頭,點知今次整咗個辮子頭,話係受饒舌歌手Travis Scott嘅啟發,但請恕我求大俠唔係好識欣賞呢個新造型囉。

手機用戶請按此放大圖表

龍格保沙格拿玩髮多變

美揚以往都會唔定期咁轉變自己嘅髮型,好似上季幫阿仙奴捧走英足盃冠軍後,就試過將個頭染成一半白一半紅,今次將自己變髮嘅近照上載去ig後,見到呢個辮子頭就有幾條辮由頭吊落嚟,驟眼望落去,竟然第一時間諗起星爺套電影《功夫》入面;由梁小龍飾演嗰位火雲邪神。不過喺外國人眼中,可能唔會覺得咁差,就算有網民鬧佢,主要都係話佢掛住扮靚,最近踢波就冇料到。都係嗰句,fashion嘅嘢,我求大俠識條鐵咩!

不過,兵工廠以往好多呢啲髮型奇特嘅球員,由當年一頭紅髮嘅龍格保開始,之後就有金色辮子頭玩中間分界嘅沙格拿,而謝雲奴嗰個中間分界仲要綁條頭箍喺額頭,就更加驚嚇。

槍手難簽神童吼戴巴拿

美揚變髮,可能之後連前鋒拍檔都變埋,因為最近傳話拿卡錫迪下季可能走人,西維爾、馬德里體育會同羅馬三間球會都爭緊呢位法國前鋒。另外,挪威傳媒亦爆料,話阿仙奴要正式簽入「神童」馬田奧迪加特唔易,因為對方始終屬意靠呢半季表現嚟說服皇家馬德里下季畀個正選位佢,所以領隊阿迪達最新目標變成祖雲達斯前鋒保羅戴巴拿。如果阿仙奴下季雙「巴」攻堅,大家又期唔期待呢?