田徑|呂麗瑤哽咽慨嘆無比賽機會 中六生破U20男子三級跳紀錄

更新時間 (HKT): 2021.03.28 15:19
呂麗瑤(圖)透露未來或有機會到歐洲出賽,故她將接種武漢肺炎疫苗以策安全。

香港田徑系列賽一周日續於將軍澳運動場舉行,呂麗瑤於女子100米跨欄以13秒57位第一,她賽後被問及奧運排名一事時,她感觸嘆說過去一年於疫情下堅持訓練,無奈失去比賽機會,期間一度哽咽,她另透露為方便到歐洲比賽,未來將接種武漢肺炎疫苗。

繼上周測試賽後,香港田徑總會今周再辦系列賽一,呂麗瑤於100米跨欄以13秒57大熱封后,她指滿意成績比上周有進步,又指假如能出外作賽定有提升,「做到一場比一場快嘅,下個月就香港錦標賽,feel到魂魄返緊嚟。可能太長時間冇比賽,個人提唔起勁,如果擺我去其他國家比賽,相信可以造到好啲嘅成績,要逼一逼我,當然都唔可以成日依賴人哋帶住我跑。」奧運排名積分截數日漸近,眼見亞洲區競爭對手疫情期間皆有機會出外參賽搶分,呂麗瑤無奈指形勢被動,斯人獨憔悴,「其實係有機會爭去奧運,但好耐冇比賽,畀人撳住嚟砌,太被動,人哋個個20、21年都有跑。」她提及捱過閉門訓練,卻苦無出場機會時更一度感觸哽咽,「撇除外在因素,至少自己要做到最好,呢個係一路堅持每日去練嘅動力。閉門時係辛苦嘅,長時間同教練遙距訓練,每一日喺體院起身得我同張宏峰互相幫手練,大家都好努力,但冇目標係最辛苦,上年香港錦標賽大家都好期待,但延遲再延遲就冇咗,大家都好無奈,唔好話奧運分,好似冇咗機會檢視自己嘅努力。」呂麗瑤透露未來或有機會到歐洲比賽,她會於疫苗計劃重啟後接種復必泰疫苗。男子組方面,張宏峰於110米欄以14秒11奪冠,去年升上成年組的王珞僖則以14秒56排第四,後者指相對去年初戰高欄時跌跌撞撞,今次已大有改善,逐漸適應欄高。

今日賽事另有新紀錄誕生,18歲的中六生陳志強於三級跳跳出15米正,以0.03米之差刷新高澔塱16年所創的男子U20紀錄,他指過去一年未能到運動場接受正式訓練,久久未有躍入沙池,主練跳遠的他期望今年內能跳出7米3左右的水平。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

-----------------------------

《體蘋果》陪你睇波講波

包羅萬有,「體」得舒服,即Like「蘋果體育」FB專頁!
BannerBanner