沙灘排球|劉梓浩抗血癌成功更學識活在當下 感激港人眾籌250萬支援

更新時間 (HKT): 2021.03.30 06:00

「比起化療副作用,我覺得練波仲辛苦,而辛苦只係感覺,你學識同佢共存,好快就會過。」求生講意志,對於前香港沙灘排球代表劉梓浩來說,在滾燙黃沙上煉成的鋼鐵意志,或是戰勝血癌的關鍵。

他跟拍檔王沛林過關斬將後取得2018年雅加達亞運資格,中途因病退賽並確診白血病,一度康復,癌魔卻又再復發,去年更因病耗盡積蓄,需以眾籌求助。猶幸一夜之間超額籌得250萬港元,其療程奏效並於今年完全康復。兩年多的抗癌經歷,讓這位26歲小伙子看透世事無常,因此努力活在當下。

劉梓浩和王沛林這對「沙排孖寶」贏過全國沙排總決賽亞軍,全國排名曾高踞第二,更在沙排場上為香港屢創佳績。二人在自費外出比賽的情況下,如願取得雅加達亞運參賽資格,怎料他們在分組賽首戰以直落2局(20:22、15:21)不敵東道主組合後,便因劉梓身體不適無奈退賽。憶起當日情況,劉梓表示賽前並無任何徵兆,惟第1局打了7、8分左右已覺不妥,除體能以不尋常幅度下跌,也無故反胃作嘔;這場比賽之後,他一度發高燒並不適送院,並迎來教人心碎的消息。「去到醫院,沛林都有問我有冇機會打落去,我都想繼續打,反正都嚟到(亞運),就算輸都好,我都想繼續打。但醫生好堅持唔畀,佢話我一定要返香港,如果我繼續打,可能有性命危險。」

劉梓返港檢查後,發現白血球指數突變、血小板偏低及出現貧血,後來更確診血癌。勤做運動、作息定時、沒有不良陋習,但癌魔還是找上了當時只得23歲的劉梓,他坦承大感愕然,腦海閃過「點解會係我?」的想法。病發之後,劉梓因體能大跌而容易疲倦,走樓梯已會氣喘,因抵抗力差也不能到健身室訓練,這教向來好動的他感到鬱悶,「我係一個好活躍、好鍾意周圍去玩嘅人,一個禮拜打足七日波都得。病後因抵抗力差而冇得出街,好多嘢都做唔到,淨係困住喺屋企或者醫院,心理上好唔習慣。」他補充比起身體的不適,心理上的調整更困難。

怨天尤人無助改善病情,劉梓決定將以往在沙排場上堅毅不屈的態度,帶到病床上跟癌魔戰鬥。他在2019年初經歷化療並接受手術,約半年後已逐漸康復。劉梓坦承確診血癌後只懂擔心病情,但病情好轉過後,他回想起跟拍檔沛林那場未完的亞運仍會覺得可惜。即使身體狀況不容許自己再以職業球員的身份征戰沙場,但劉梓卻從未因病而萌生放棄沙排的打算,他更直言這項運動帶給自己的滿足感無可取替。他更自爆完成第一次化療,住院個多月後,出院做的第一件事便要打球,「中間有冇話因為病而放棄排球?其實都冇,只不過我係由一個專業運動員,變返可能淨係玩吓,打吓香港嘅比賽。」

為了繼續留在球場,劉梓積極考取排球教練及體能教練等牌照,並到不同的中小學執教幫補生計,怎料武漢肺炎在2020年襲港,逼使他再度暫別排球,到年中更迎來癌細胞復發的壞消息,他直言有心理準備復發的存活率更低,但自己也只能堅強面對,以正面心態接受治療,「呢樣嘢唔係我控制,我都冇得逃避。我要好返,我要繼續生活,我就一定要面對佢,學習同佢共存。」

不過,一眾體育教練在疫情下接近停工,劉梓更在2019年12月起零收入,令經濟負擔百上加斤,於是他翌年8月在無計可施之下,只好嘗試在網上發起眾籌,最初目標金額為60萬港元,當中50萬預留作第2期新型標靶藥Blincyto的藥費,其餘10萬元會用作其他醫療費用及手術後康復期間的日常開支。怎料眾籌在一夜間已超額完成,共得250萬港元,令劉梓有機會接受從美國引入的嶄新療法,他直言當時大感驚訝,「我嗰時都好震驚,如果有人入錢畀我,手機會彈通知出嚟,話畀你知有邊個入錢。我部手機成晚都冇停過咁滯,我覺得好癲呀,真係冇諗過。」他也感激港人在疫情下,仍願意向陌生人伸出援手,「香港人已經經歷緊疫情,其實好多人我都唔識嘅,但佢見到我咁樣做個眾籌,都肯捐錢畀我。可能佢哋喺疫情下都係經歷緊困境,但都為咗我付出。」

最終完成眾籌的半年後,劉梓宣佈再次康復,再度重生。他笑言運動員的經歷,或多或少有助抗癌,尤其是他常常烈日當空下在沙灘練習,意志早已經過千錘百煉,「喺咁曬、咁熱嘅沙上練習係好辛苦,但我成日都會同自己講,咁辛苦嘅嘢都係感覺嚟,好快就過。我病嘅時候,我都係咁諗,做化療,或者有咩副作用,全部都只係過程。」

無論是打沙排或抗癌,劉梓也無懼打逆境波,就以全國沙排賽為例,他笑稱自己跟沛林成軍初期是眾人眼中的魚腩隊伍,每支球隊也渴望跟他們同組,輕鬆拿下分數。劉王二人全職訓練後漸見進步,2017年的敦煌站得季軍、拿下首面獎牌之後,搖身變成眾人盼避開的勁旅,「開頭大陸啲隊抽到對我哋,佢哋係好開心,因為佢覺得我哋渣,一定贏。但係我哋打到攞獎後,佢哋就好驚抽到我哋,因為我哋就係打得快,佢哋未必跟得切,佢哋適應唔到我哋個打法。」

癌症復發之後,劉梓看透世事無常,因此學懂活在當下,凡事心動不如行動:「我有啲嘢好想做嘅話,就會即刻做咗先。」他稍稍停頓,再補充,「因為我都唔知之後究竟有冇機會做到。」平日以電單車代步的他透露,在血癌復發時,問過自己有甚麼很想做到的事,「我復發之後,我問自己有咩係好想做。我身邊揸電單車嘅人,都係我啲中學同學,我嗰時想同佢哋一齊遊一次車河。當我完成治療完、出咗院,我已經環咗成個香港一次,由港島去西貢,之後去返沙頭角,沙頭角落去東涌,兜咗一大個圈,約200幾公里,玩咗一日。」

除此之外,劉梓坦承從患癌到痊癒的過程中,深刻感受到家人對自己無條件的愛,令他更加懂珍惜親情。性格外向的他,面對家人的時候變得內斂,他自言家人之間也甚少表達對彼此的愛,但他患病之後,一切也變得不同,「家人雖然冇講咩,但係佢做嘅所有嘢,都係話緊畀我知,其實佢係好錫我、好擔心我。」劉梓笑言,第一次骨髓移植,以及化療住院時,家人探病也只會一起看電視,等探病時間結束便會離開,他笑言這種陪伴同行的感覺教自己安心,「家人都好體諒我,知道就算問完我攰唔攰都冇用,因為佢哋根本做唔到啲乜,所以佢寧願喺側邊陪住我。」

這位前香港沙排代表以往全情投入打球,每年有超過一半時間離港集訓和比賽,甚少時間陪伴家人,他更打趣道家中所養的狗都未必認得自己。劉梓盼疫情過後可以跟父母、兩位姊姊及阿姨一起去旅行,「我好想同屋企人去一次旅行,係全家同埋阿姨,我印象中都未試過,之前有親戚喺日本結婚,但我要比賽練波,咁就去唔到。」

劉梓坦承在治療期間,曾留意在雅加達亞運包攬6金的日本女泳將池江璃花子在2019年1月確診血癌的消息。後者暫別泳壇594日,去年8月29日在東京舉行的特別水泳大會復出,更決定參加今年4月舉行的奧運選拔賽,保留在主場出戰奧運的希望。不過,劉梓卻直言未有復出的打算,「我哋差唔多時間病發,我都好奇,佢會唔會好返之後就做返運動員呢?佢𠵱家練返,但係我暫時冇話想做返職業運動員,因為都怕屋企人擔心,可能轉換吓角色。」

要放下職業球員的身分,等於要跟多年拍檔王沛林拆夥,這對劉梓而言絕不好過。這對沙排孖寶並肩為香港而戰,最高峯曾在2017年全國沙灘排球巡迴賽總決賽中奪得亞軍,全國排名高達第二,並打出香港有史以來的佳績,將沙排項目「打入體院」,令這項運動符合資格成為香港體育學院受資助的精英B+級項目。劉梓坦承,跟沛林的關係就像兄弟,能夠跟目標一致的人成為拍檔極之難得,「有邊個會肯咁樣自費,返住part-time,跟住咁落力去練波,諗住衝一個亞運(資格)返嚟?你仲要搵到兩個人目標係咁一致,其實係困難嘅。」

被問到可有興趣以教練身份教出一支打入亞運的香港沙排代表隊時,劉梓卻苦笑道「首先要有人。」若有後輩希望再衝亞運資格,劉梓直言對方必要像自己一樣經歷捱窮打沙排的過程。在香港「冇成績冇資源」的制度下,劉梓的往績未能替沙排球員爭取資助,他也難掩無奈,「我攞完個資助之後病咗,呢個成績唔可以幫其他打沙灘排球嘅人,我覺得好可惜。」不過若有人以此為目標,並願意為之付出的話,劉梓直言可以一試。

劉梓慨嘆香港的社會風氣金錢掛帥,自己打球追夢,在旁人眼中或是儍氣行為,但他卻無悔付出,更指打沙排的最大得着,是學懂堅持。「運動好特別,就係你付出幾多,就會攞到幾多。所以堅持呢樣嘢,潛移默化之下,影響我每日嘅生活。」這位26歲的小伙子更舉例說,即使現時體能變差,走幾級樓梯也會氣喘,但他卻不會輕易言棄,「我住嗰邊好多樓梯,我返屋企食飯,要行一條好長嘅樓梯。其實會攰嘅,但係我以前都行到,點解𠵱家行唔到呢?我堅持行多幾步,當做吓運動。運動就係可以咁得意,可以改變一個人個諗法,日常生活都唔同咗。」

憶起過往的職業球員旅途,劉梓表示自己是個着眼當下的人,「我唔會諗得太遠,冇諗過自己會行到邊度,只係中間嘅過程不斷見到有機會,然後我就去爭取,最終去到亞運。」就如他與癌魔打仗時,他沒有將醫生告知的存活率放在心上;盡力呼吸,生存下去,大概是劉梓開始抗癌後的唯一目標。

總結這兩年多的抗癌經歷,劉梓認為一切皆是「難得」。即使在鬼門關前走過兩次,他也保持樂觀地笑說,自己在這場仗不能逃避,而苦難只會讓自己更堅強:「呢個只不過係我比人哋多嘅經歷,我唔覺得係一件好負面嘅事。其他人係冇經歷過,而我經歷咗之後,係會比佢哋叻。」

劉梓浩小檔案

出生日期:15/10/1994(26歲)

身高:1米86

威水史(拍檔:王沛林)

全港沙排錦標賽男子甲組 冠軍(2015至18年)

全國沙排總決賽 亞軍(2017年)

全運會 第6(2017年)

全國沙排巡迴賽敦煌站 季軍(2017年)

亞沙運 第5(2016年)

記者:許嘉明

攝影:羅錦鴻

-----------------------------

《體蘋果》陪你睇波講波

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

包羅萬有,「體」得舒服,即Like「蘋果體育」FB專頁!
BannerBanner