亞洲放題:清水、德島互無優「細」

更新時間 (HKT): 2021.04.03 02:00

《亞洲放題》第一次同各位讀者見面,今個星期我同牛兄就講吓波衫。球壇嚟講,日本嘅波衫設計都算係世界級,特別得嚟又唔會太過誇張,完全體現到日本人嘅設計美學。

提起日本嘅波衫,相信好多球迷都會諗起日本國家隊喺90年代最經典嘅「多哈悲劇」同埋「火燄」波衫,呢兩款波衫到廿幾年後嘅今日依然受到唔少波衫發燒友嘅追捧,就算喺日本國內都炒到上天。除咗日本隊外,日職嘅波衫都好有特色,例如1995年首次晉身日職嘅大阪櫻花,佢哋夠膽用粉紅色做主色真係走得好前,相信當年都唔係人人接受得到,不過廿幾年後嘅今日都已經有唔少球隊都着緊「粉紅戰衣」喇。

另一件不得不提嘅日職波衫就梗係清水心跳啦,橙黃色配搭世界地圖圖案,廿幾年後嘅今日再睇番都唔覺得過時。筆者仲記得當年香港嘅「豹牌」專門店都有呢件衫買,仲賣到成1,200蚊,喺90年代嚟講真係超貴。講起清水,呢支日職老牌球隊近年人才凋零,一直喺中下游位置浮沉,雖然今季暫時排緊日職第九位(未計周五戰果),不過表現唔算太穩定,今輪主場對「升班馬」德島漩渦都冇必勝把握。

不過𠵱家排12位嘅德島亦唔好得去邊,今季作客未贏過,而且踢咗6輪場只入5球。兩隊季初入波都唔多,相信今場都未必多波入,入球中位數[2.5球]嘅「細」都博得過。

另一場FC橫濱主場對柏雷素爾,橫濱開季連輸6場兼失18球,完全冇反底迹象;雖然柏雷素爾都唔好得去邊,不過球隊開季對親大部份都係強隊,今次對住魚腩橫濱就試到佢哋堅定流,客勝賠率唔錯值得一試。星期六仲有一場名古屋鯨魚對FC東京,主隊近期對強隊入波唔多,而東京今季作客成績又普普通通,睇嚟鯨魚都係小勝格,可博1:0波膽。

文:薰爵

《亞洲放題》為讀者精選各大亞洲波筍盤,每個周六約定你任點任食。

包羅萬有,「體」得舒服,即Like「蘋果體育」FB專頁!
BannerBanner