Goal富帥:AZ爭亞軍勢炒鹿特丹

更新時間 (HKT): 2021.04.09 02:00

踏入4月,北歐聯賽相繼開鑼,大台號稱最期待嘅瑞超今周開「咧」,初步睇馬模就繼續大超班,保留上季封王人腳之餘,仲加咗幾件潛質新秀,不過啱啱開「咧」就睇定啲先,有心水先同大家分享,今周繼續玩踢到火紅火綠嘅荷甲。

𠵱家荷甲前列形勢都好簡單,阿積士好似曼城咁帶離成條街,冠軍都冇咩懸念,亞軍就有排爭,始終有得直接拎下季歐聯資格,唔少強隊都爭崩頭,家吓燕豪芬同阿爾克馬爾(AZ)同得58分,AZ得失球稍差排第三,所以餘下比賽除咗目標拎三分,仲希望盡力大炒,以佢哋擁有艾拔古蒙臣、保亞杜等猛將,就算古普美拿斯上仗拎紅牌,周六主場對鹿特丹斯巴達要停賽,牌面上都係優劣分明。斯巴達排中游,護級壓力真係唔大,無錯近況真係幾好,近5仗拎到3勝2和,不過對手都係同級分子,相反之前遇上傳統豪門,好似阿積士、燕豪芬、飛燕諾都大敗。世界博彩公司平均值,AZ主W有1.47倍,約為讓一球中水,不過對AZ防守力有信心,加上主場四連勝,亦都以兩球或以上比分炒對手,求較好分頭回報,要「讓球主客和」「主勝」,始終嚟到季尾,都係鬥志行先。

護級球隊方面,威廉二世比較值得跟進,上仗輸一粒畀AZ,之前五場都拎到分,作客和到川迪、維迪斯等前列分子,水準唔差。周六威廉二世就作客荷華高斯,荷軍上輪就俾燕豪芬大炒三粒,攻力亦只係一般,位置上亦喺中游,冇咩明顯目標,初盤只係讓平/半,莊家都欠缺信心,威廉二世下盤可以一試。

文:Goal進

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner