Goal富帥:撐阿積士敲「羅」打「大」鼓

更新時間 (HKT): 2021.04.13 02:00

上周六重心阿爾克馬爾[-1]順利開出,今個周中冇荷甲,都係搵番荷甲球隊有份玩嘅歐霸盃賽事嚟賭;八強次回合羅馬主場對阿積士(圖),阿積士首回合贏形勢但就輸波,今次次回合一定要攻,遇上羅馬近期防守力又麻麻,呢啲情況就一定追「大」。

阿積士周日場荷甲作客華域克,冇理歐霸盃後顧,照樣排出強陣,包括安東尼馬菲奧斯、杜辛泰迪治、卡拉臣等主力,臨場就梗係落晒飛,「讓球」去到讓兩球/兩球半,入球「大」[3.5/4球]都落晒飛,結果只靠冇份踢歐霸盃嘅施巴斯坦賀拿入一粒,以1:0小勝,跟風飛真係輸到眼坦坦。之前都提過,高大中鋒賀拿加盟咗阿積士,反而對球隊進攻冇咩幫助,就算呢場佢一箭定江山都係咁話,歐霸盃冇佢份,又可以見番一隊效率高、速度快嘅阿積士。星期四次回合作客羅馬,贏1:0都要出局,真係唔擔心阿積士進攻決心,其實首回合主場輸波都幾唔抵,12碼唔入、門將舒靴賓派大膠,結果由贏變輸。阿積士今次無論用舒靴賓定史基倫堡守龍,後防都唔多似穩陣,所以可以繼續追「大」。

羅馬近況都唔錯,上仗小勝博洛尼亞,近3仗2勝1和,今次和波就出線,反而莊家唔多睇好,世界博彩公司平均值,羅馬W竟然有2.65倍,反而阿積士2.4倍,平手盤羅馬仲要高水,就真係驚驚地,所以都係唔玩「讓球」盤。睇番羅馬踏入淘汰賽,5場波都有4場總入球3球或以上,近4場歐霸盃主場都入到3球或以上,包括炒克盧日5:0,真係單邊都夠開「大」,打反擊亦有一手,信兩隊鬥攻再開「大」。

同日有分頭選擇,就揀布拉格斯拉維亞同阿仙奴,布拉格斯拉維亞一路以黑馬姿態晉級,淘汰過李斯特城同格拉斯哥流浪兩支英國兵,主場兩場都和波,今次有一個作客入球喺手,一定先求穩守,阿仙奴唔係咁易咬得入,和波合理。

文:Goal進

截稿前馬會尚未開盤,盤口僅供參考,讀者記得留意足智彩網頁。

【資料寶藏】

羅馬歐霸盃5場主場取4勝1和,上圈戰薩克達亦輕鬆以3:0取勝,累積轟入14球。

包羅萬有,「體」得舒服,即Like「蘋果體育」FB專頁!
BannerBanner