亞洲放題:神戶攻守兼備客W去「馬」

更新時間 (HKT): 2021.04.17 02:00

日本球迷出晒名世界級,夠熱情又有質素,上屆世界盃期間日本球迷睇完波主動幫手執垃圾仲成為一時佳話。至於日職球會過去亦都好着重球迷活動。但隨武漢肺炎疫情喺日本持續嚴重,今季日職嘅氣氛已好唔同。

今季日職開季之前已有禁止現場球迷揈旗同唱歌等一系列新規定,防止出現「睇波群組」。除此之外,因應日本國內唔同城市嘅疫情,頒佈咗緊急狀態嘅地方只可以畀最多5,000名球迷入場觀戰。雖然日本家陣睇波限制多多,不過有得入場算好好。

疫情期間,唔少球會都諗計搞健康又有意義嘅新活動,就好似橫濱水手嚟緊會開一啲以女性同家庭主婦為對象嘅足球班。至於神戶勝利船就撈埋旅遊業,今個月底將會搞個本地一日遊,球迷可以坐神戶嘅隊巴遊覽球場同名勝。

神戶雖然搞巴士團吸客,不過佢哋班球員落場就唔興「泊大巴」,球隊周六作客湘南比馬,神戶嘅日本國腳古橋亨梧近期勁到噴火,連續四場有波入,加上今季後防又穩陣咗好多,今仗對住實力平平嘅湘南應該穩陣袋三分,直取客W。

星期六另一場心水就係德島漩渦對鹿島鹿角,德島對上11日踢足4場波,一眾球員體力成疑,加上球隊今季由鹿島借入嘅前鋒垣田裕輝今仗又唔可以上陣,呢位23歲前鋒今季已射入3球,對德島火力有一定折扣。至於鹿島日前就炒咗教練薩高,由球隊名宿相馬直樹接手,不過呢位前日本國腳過去嘅執教成績一般,鹿島今場都未必有大反彈,不如博個[2.5球]嘅「細」好過。

下星期日嘅日職亦都有川崎前鋒對廣島三箭嘅大戰,廣島三箭今季作客失波都幾多,加上前鋒上場輪換,一班主力唞夠,今場肯定大開殺戒,直取「讓球主客和」「主勝」!

文︰薰爵

《亞洲放題》為讀者精選各大亞洲波筍盤,每個周六約定你任點任食。

包羅萬有,「體」得舒服,即Like「蘋果體育」FB專頁!
BannerBanner