求驗客手記:西盃決賽嘆「包」 隊友輪流合照 美斯捧「散水盃」?

更新時間 (HKT): 2021.04.19 02:00

巴塞隆拿上星期六喺西班牙盃決賽,喺下半場13分鐘內連入4球,包括美斯梅開二度,最終以4:0大炒畢爾包,第31次捧走呢項錦標。不過,唔知係咪驚以後冇機會,完場後一班巴塞球員,竟然排住隊同盛傳會喺季後離隊嘅美斯合照,搞到好似最好一次為巴塞上陣嘅決賽咁。至於畢爾包就真係「慘慘豬」喇,原本仲諗住有機會借住疫情關係,喺1個月內連贏2屆西盃,點知就雙失收場認真冇癮。

19/20年西盃決賽由畢爾包對皇家蘇斯達,由於雙方都想喺球迷入場見證下先踢決賽,結果一直拖到今個月三號先上演,最終都等唔到球迷入場,而畢爾包亦以0:1輸咗畀皇家蘇斯達。

「雙失」畢爾包吞四蛋

喺短短兩星期之後,佢哋又要喺今屆決賽硬撼巴塞,牌面實力贏晒嘅巴塞,今場一開波就壓住畢爾包嚟踢,仲有唔少攻門機會,但就係入唔到波,半場互交白卷。換邊後踢到60分鐘,巴塞終於嚟料,先由基沙文喺門前接應法蘭基迪莊地波傳中撞入打開缺口,三分鐘後又到佐迪艾巴交出助攻,由迪莊近門頂成2:0。跟住就輪到美斯發威嘞,呢位阿根廷球王先後喺68同72分鐘建功,為巴塞鎖定4:0勝局。連同呢兩球在內,美斯今季喺各項賽事夾埋已經入咗31球,係佢連續13季入到最少30球。

美斯巴塞生涯第35冠

呢個已經係美斯喺巴塞生涯嘅第35個冠軍,亦係佢個人第七次贏到西班牙盃,令佢同碧基、布斯基斯一齊追平咗由畢爾包名宿基恩沙保持嘅西盃捧盃次數紀錄。美斯歷嚟喺西盃決賽累積入咗九球,亦成功壓倒另一位畢爾包名將薩拉(八球),成為喺呢項賽事決賽歷來入波最多嘅球員。

巴塞上季四大皆空,係07/08年球季以嚟首次,加上喺歐聯俾拜仁慕尼黑以8:2「血洗」,美斯亦一度意興闌珊,喺休季時爆出離隊風波。幾經波折終於再嘗捧盃滋味,呢位33歲老將真係百感交集,佢賽後話成世人都效力呢支球隊,能夠以隊長身份捧盃真係別具意義。佢仲話今年對巴塞嚟講真係好艱難,但注入咗新血後球隊已經慢慢強大起嚟,希望可以藉住今次勝利,喺西甲後上封王。上任後一直俾人睇死嘅朗奴高文,亦都話目前喺西甲排第3、以2分落後榜首馬德里體育會嘅巴塞,一定會為錦標戰鬥到最後。

雖然巴塞喺美斯帶領下又擸一冠,但一日未續約,都唔知佢出年仲會唔會留喺魯營球場,有外國傳媒就捕捉到一個相當有趣嘅畫面,成班巴塞隊友竟然排住隊同美斯合照,十足十「last day」餞別咁款,夠晒耐人尋味。

包羅萬有,「體」得舒服,即Like「蘋果體育」FB專頁!
BannerBanner