Goal富帥:鳥棲盃賽冇心機下盤有「福」

更新時間 (HKT): 2021.04.20 02:00

今個周中日職就停一停,進行日聯盃第三輪分組賽。之前兩次都睇到,好多球隊都會派好多新人同後備落場,往往同聯賽水平差好多,鳥棲砂岩係我愛隊之一,不過只限日職,今次日聯盃就真係要佢哋對家,敲福岡黃蜂下盤。

季初讚過鳥棲砂岩由南韓教練金明輝入主後,就實行體力化戰術,做好多逼搶同前場攔截,得出嘅成績都算滿意,上場2:1打破名古屋鯨魚不敗身,就真係非常精采。但正因為付出咁多體力,鐵人都會冇力啦,今場日聯盃無可避免要大輪換,始終家日職氣勢咁好,爭標都唔係完全冇可能。但佢哋日聯盃兩場分組賽輸晒,上輪主場對北海道札幌岡薩多,更加1:5大敗,睇個款都似盡快輸晒出局。

「升班馬」福岡黃蜂(右)近期都叫穩步上揚,雖然日聯盃分組賽兩場都輸晒,不過睇得出佢哋用兵較鳥棲有誠意啲。近期聯賽戰績好咗,護級壓力都細咗,真係有啲動力玩吓盃仔。初盤鳥棲只係讓平/半,已經擺明唔夠信心,一定要下盤,睇番福岡近期防守都改善好多,對大阪飛腳、FC東京都冇失波,可以補埋入球「細」。

另一場心水係柏雷素爾主場對湘南比馬,柏雷素爾分組賽2場拎到3分,但主場都竟然輸畀FC橫濱;湘南比馬唔經唔覺已經六場不敗,日聯盃亦都未輸過,有得受讓平/半就一定要下盤,以柏軍防守力都麻麻,敲吓入球「大」都幾好。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner