Goal富帥:西維爾決心夠「利」上盤

更新時間 (HKT): 2021.04.20 02:00

上個周末兩場瑞超心水都開出,不過最激氣就係推介卡爾馬W,足智彩竟然冇開盤,搞到蜑家雞見水。講起唔開盤,意甲、西甲都去到尾聲,應該都有好多疑點賽事,特別係已經篤定降班球隊嘅盤唔開,大家真係要小心。

西甲周中就加開快車,三頭馬車爭標就當然好刺激,不過大家唔好忘記西維爾(紅衫),雖然爭冠就真係只得數字上可能,不過爭前四決心好夠,歐聯出局後戰績亦十分穩定,唔經唔覺已三連勝,上仗作客反勝皇家蘇斯達,表現好對辦。難得隊波名氣唔夠三強響,盤口唔算好辣,周三作客利雲特,世界博彩公司平均值,西維爾客W有1.69倍,讓半/一仲有高水,非常值博。

西甲護級安全線一般就較英超低,大約36、37分已經足夠上岸,利雲特家陣有38分在手,隊波唔似想爭歐霸盃資格,可以預期季尾幾場繼續風流波放分。講真利雲特近期就真係差,近四仗只贏過包尾嘅伊巴,其餘全部輸晒,上仗對維拉利爾都輸到1:5,認真肉酸,今次對攻力更強嘅西維爾,隨時又大敗。

西甲護級形勢都幾亂,周三就有場護級大戰,由艾爾切主場對華拉度列,2隊相差1分,一場勝負就足以改變排名,預雙方都會幾保守;睇世界博彩公司平均值,呢場波和局只得3.01倍,係今周西甲和波最熱一場,信莊家眼光,就跟呢場「D」。

文:Goal進

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner