Goal富帥:全北新戰術「細」難過「江」

更新時間 (HKT): 2021.04.23 02:00

周中有份電視直播講嘅韓職榜首大戰蔚山現代主場鬥全北汽車(圖),2隊就和0:0,不過都睇到唔少嘢,周末兩隊又分途出擊,又點部署呢?

先講全北汽車,和波對佢哋冇咩影響,以六分繼續領先現代。不過教練金相植場波嘅調動就非常古怪,食糊人物伊祖辛高雖然正選出場,不過中前場其他主力,好似翼鋒莫度巴路,好波之人邦本宜裕同韓教元收為後備,但踢廿零分鐘就換番莫度巴路同韓教元入嚟,下半場一開又再換入邦本宜裕,真係唔知道佢點部署。用陰謀論諗,韓職都係呢兩隊獨大,唔想咁早拋離啩。星期六全北就作客FC江原,如果保持呢個古怪作風,入波應該唔多,重心係半、全場都要「細」,主隊江原有得受讓平/半,更加可以支持,點解?因為江原重視本地班,有兩個外援都好少用,欣賞佢哋,盲撐!

另外就當然要講蔚山現代,拎完亞冠盃後,球會開始縮水,本身強勁嘅陣容削弱咗好多。首席射手祖利亞尼加奧去咗中超搵食,雖然加番李東俊同軒達斯亞,仲有尹比加林等好波之人,但新任教練洪明甫風格上同之前唔同,以往現代玩華麗組織,中前場互傳入楔,但洪明甫後衞出身,戰術就以防反為主。雖然以中堅貝菲斯為主嘅後防都叫穩定,但變相攻力就大減。下星期日現代就會作客仁川聯,牌面就真係一面倒,仁川聯上場贏波先升上尾二,不過積分差距唔大。最欣賞仁川聯個10號仔伊利亞斯阿古拿,有腳法有射術,已經有五個聯賽入球,人腳係就係現代高啲,但戰術問題未必咬得入,場波可能係均勢,仁川聯受讓半/一,一定要下盤。

文:黃耀富

截稿前馬會尚未開盤,盤口僅供參考,讀者記得留意足智彩網頁。

資料寶藏

FC江原主場5戰取得2勝1和2負,累積失四球,是韓職主場失波第二少球隊之一。

包羅萬有,「體」得舒服,即Like「蘋果體育」FB專頁!
BannerBanner