Goal富帥:西維爾遇風流波大炒「格」

更新時間 (HKT): 2021.04.23 02:00

周中西甲心水都唔錯,不過西維爾(圖)由讓半/一打到讓一球,最終只小勝1:0;另一場護級大戰,艾爾切1:1和華拉度列,2.85倍和波都算有啲分頭啦,希望幫到大家。

歐超聯單嘢變咗球壇鬧劇,皇家馬德里會長佩雷斯就真係做晒醜人,家陣仲要唔忿氣鬧英超反對班球迷係有人指示,睇個勢皇馬就嚟變成球壇公敵。其實西甲一向都係皇馬同巴塞隆拿惡晒,已經控制晒大部份資源,以轉播費為例,上季成個聯賽轉播費分賬約5億鎊(約54億港元),2隊就加埋就分3億幾鎊,淨低4成由其他18隊分,點會唔令到強弱懸殊進一步加劇。

講真西維爾喺西甲雙雄,加上馬德里體育會嘅陰影下,有家陣咁嘅成績都幾值得尊敬,挾住四連勝氣勢,下星期日返到主場,面對都算風流波嘅CF格蘭納達,三分真係冇難度。世界博彩公司初盤,西維爾主W就1.45倍,既然對西維爾有信心,就直接轟個「讓球主客和」「主勝」。CF格蘭納達歐霸盃出咗局,又唔愁降班,基本上餘下賽事都係風流波,作客戰績又差,連埋盃賽在內近7場作客輸足6場,今次真係凶多吉少。

星期六有唔少護級大戰,其中華拉度列主場對卡迪斯,華軍近期都算搶到分,榜尾幾隊嚟計,對佢護級最有信心;卡迪斯之前連贏兩場,有啲上咗岸嘅feel,上場主場都吞皇馬三蛋,今次作客,就算受讓平/半都要唔過。

文:Goal進

截稿前馬會尚未開盤,盤口僅供參考,讀者記得留意足智彩網頁。

資料寶藏

西維爾近9場聯賽主場取得8勝1負,僅不敵前列球隊巴塞隆拿。

包羅萬有,「體」得舒服,即Like「蘋果體育」FB專頁!
BannerBanner