趣趣地:紅軍補時「失2球」痛失2分

更新時間 (HKT): 2021.04.25 02:00

仲爭緊下季歐聯席位嘅利物浦,上周六喺英超早場,領先咗差唔多90分鐘,到補時先至失守,俾作客嘅紐卡素逼和1:1,痛失兩分。

開波三分鐘,沙迪奧文尼左路大腳傳中,紐卡素守將頭槌解圍不遠,穆罕默德沙拿喺對手力壓下控定波,轉身大腳抽入個人今季第20個英超入球,為利物浦射成1:0。呢位埃及射手亦成為喺英超年代,第1個可以喺3個球季,分別攻入最少20球嘅紅軍球員。

之後雙方互有攻守,踢到補時兩分鐘,後備出場嘅哥林威爾遜入波,但VAR檢查之後,發現佢手球在先而唔算。但利物浦始終都係保唔住三分,補時五分鐘,阿仙奴借將祖爾韋洛克喺龍門口起腳,個波省中法賓奴泰華利斯改變方向入網,紐卡素就咁就追和1:1完場。

另一方面,阿仙奴上周五就喺主場以0:1輸畀愛華頓。兵工廠今場有唔少機會,丹尼施巴路斯仲曾經博到12碼,但VAR介入話尼高拉斯比比喺組織過程中越位而推翻判決。但更「嘔血」就喺76分鐘出現,門將賓特尼奴應付地波傳中時竟然屙蛋擺烏龍,25年嚟第1次喺英超主場輸畀愛華頓。

包羅萬有,「體」得舒服,即Like「蘋果體育」FB專頁!
BannerBanner