球壇話當年|踢波兼做歌手及內褲model 文彼得談南華最後盛世:一切靠包裝

更新時間 (HKT): 2021.05.02 06:00

球壇在疫境下復甦,若南華仍在港超聯,會令球市更熱鬧嗎?這支老牌球隊在千禧年代經歷護級失敗但被挽留,繼而再度成為班霸,亞協盃打入4強一役令大球場紅旗高掛,風頭一時無兩,該隊管理層將宣傳手法亦把足球員重新包裝,當時拍過廣告夾過band的文彼得是代表球員之一,由他講當年的點滴就最好不過。

那個南華最後盛世,要先由黎明前的黑暗講起。南華在千禧年代初以「全華班」出戰港甲,成績一直在中下游,至2005/06球季聯賽煞科日僅以公民賽和1:1護級失敗,按例需降落乙組作賽,卻又得到足總挽留,更有商人羅傑承再度入主,組巨型班續戰甲組。

重組的南華引入多位外援,該季新加盟的本地球員不多,當時的流浪隊長文彼得是其中一人,現為天水圍飛馬董事的他表示:「效力咗流浪5個球季,係好好嘅平台表現自己。嗰年羅生(羅傑承)入主南華,佢又知我同流浪完約,就搵我傾。」效力流浪時,曾經會相當期待與南華交手,因為南華有歐偉倫、李健和、阿拉烏蘇、仙奴等強手,「當時輸得唔多已經開心。」慢慢南華組軍方針轉變,最終淪落到護級收場,但卻迎來轉機,再組成強隊征戰港甲,機會來到,文彼得沒有太多考慮,「南華會歷史悠久,當刻都冇乜包袱,由降班變到實力有咁上下球隊,其實都未知表現會點,由零開始。」決定轉會一刻,連南華將會簽入什麼球員也不知道,「流浪又未同我傾,加上南華會傾到個好價錢。南華會,衰啲講句,錢少都想上去試一試,碰碰運氣。」

南華在當季立即展現出班霸本色,文彼得贏得他首個聯賽冠軍、銀牌冠軍及足總盃冠軍。成績以外,羅傑承任南華足主的那個年代,最擅長把足球包裝,文彼得說:「幫球員搵多啲sponsor,令佢哋成為足球明星。周邊國家都有啲品牌去包裝球星出嚟,但香港一直都缺乏呢啲人。」當時南華找到全球知名的服裝品牌贊助西裝,文彼得續說:「件事咪好靚囉,可能會畀人話唔好搞咁多嘢,踢好啲波,但有時踢波以外,都有少少嘢可以做,畀人講吓,唔係淨係睇波嘅人知道南華會,可能第二個界別都會聽到南華個名。」

比起名牌西裝贊助,當年更多人談論的,是文彼得與陳肇麒那個內褲廣告,文彼得說:「拍廣告都係希望多啲足球界以外人士知道個會,係會方想做嘅事。」拍攝經驗不多的兩位足球員,在多人面前只穿內褲,「梗係尷尬啦,基本上得條三角形嘅底褲,有好多工作人員,男男女女都有,又要望住鏡頭要有自信樣,好難集中。」

其實文彼得仍效力流浪時,已簽過英皇娛樂,「我問番嗰陣個經理人點解會簽我,佢話見我幾特別,健健康康,成個運動員咁,咪試吓囉,點知我真係運動員。」文彼得說,當時趁年輕,什麼也試一試,覺得娛樂圈不太適合。其後轉到羅傑承旗下的娛樂公司,與陳肇麒等隊友組過樂隊出唱片,他說:「嗰時都係想有另類話題畀人講吓,笑就實畀人笑,我又唔係好介意。唱歌加踢波,有得諗吖嘛。」

有更好的包裝,也需要球隊有好成績,才能吸引到球迷。南華自2006/07球季起連贏4季港甲,但本地賽並非當時南華的目標,他們希望可以征服亞協盃,在2009年那一屆,創造了千禧年代本地足球最轟動的一場比賽,文彼得說:「嗰季係最毛管戙,亞協8強,作客最後輸球12碼,落後4:5,但主場1:0贏作客入球晉級4強。4強主場嗰場波,係我代表球會踢正式比賽,第一次大球場全場爆滿。」南華在當屆亞協盃8強淘汰烏茲別克的尼夫治,4強與科威特競技交手,首回合作客以1:2落後,次回合在香港大球場上演,賽前已預售過26,000張門票,最終有37,459名球迷成功入場,難得在香港大球場爆滿的情況下,球迷是為香港球隊打氣。

文彼得在一片紅海下步出球場,「一行出嚟球迷已經起哄,嗰下我終於明白外國波點解咁好體能,嗰種支持係會令你個人好熱血,嗰場波可能係氣氛令我可以走上走落,我諗呢個就係主場優勢。」只要贏1:0就可以晉身決賽的南華,在65分鐘找到期待已久的入球,卡里祖後腳傳予隊長李海強射入,但被判越位在先,有球迷激動到把雜物擲向旁證,文彼得說:「唔好怪我咁諗,我當時係想快啲開波,仲有時間。明白係唔抵,擺明就冇越位,嬲就實有,但足球就係咁,有啲人為因素,但我哋都做得唔夠好,如果入得夠清脆,就判唔到我哋越位。」

完場前8分鐘,科威爾競技攻入一球,最終兩回合計南華以1:3落敗,無緣決賽。文彼得說:「入到更衣室,差唔多九成人都喊,羅生都眼濕濕。我哋唔係一、兩場波,係建立咗兩、三年嘅事,部署咗咁耐,諗住行埋呢步,我都唔識講,成班人都好失落。」縱使只能追平晨曦的4強戰續,但這場比賽足以成為經典,「同親嗰期嘅隊友食飯,都會講番當時,感覺好難再有。我成日都講,嗰時我都未識我老婆,佢話我成日講以前點勁,舊屎沖咗喇,個仔都3歲喇!」

亞協盃4強之外,南華令人印像深刻的還有「畢基的風」,他們在2011年簽入畢特和基士文兩位曾在歐洲頂級聯賽多年的球星,講起這兩人,文彼得說:「好少同佢哋接觸,都係到球場就練波,球場外都唔會一齊食飯,咁佢哋又唔係踢得耐,半季左右。」不過,短短時間,文彼得認為在畢特身上學到很多,「有啲嘢,教練未必教得通,唔明就係唔明。畢特呢,係做畀你睇,佢成日教我哋做個動作,呢啲叫身教,學到好多嘢。」有這種世界級球員每日在旁,文彼得對自己要求更高,「都驚交個波交得唔好,畀佢哋笑㗎。」

講起外援,那時候的南華很多經典,文彼得隨口也講到幾個,「迪天奴、T史高斯、麥士維,伊達,雷文,卡里祖,呢幾個都好有級數。」特別問他,現時飛馬王牌達斯華與同屬翼鋒的麥士維比較,喜歡那人多一點,他說:「鍾意麥士維多啲,真係好快,又快、又好體能、又硬淨、射波又好。艾華都快,但佢淨係跑得快,麥士維係變速都好快。」

2013年文彼得「落山」,「落山嗰刻係好唔捨得,始終同南華同羅生有感情。」他選擇加盟東方,「嗰年其實我想證明自己係咪可以繼續踢,去東方試吓有冇機會,去到東方初時都唔係必然正選。」那年文彼得31歲,他踢到33歲掛靴;羅傑承也在2014年離開南華,這個南華的最後盛世到此告終。

後記:要還「文總」一個公道

口才好的球員很多,港足前隊長陳偉豪就因為講廢話也能講到頭頭是道,被球迷冠以「8+1 upper」,但我一直認為,文總的「8+1 up」水平絕不比豪哥低。

訪問當日特別跟文總講這件事,問他對豪哥這外號有何感覺,「我同佢識太耐喇,15歲識,識咗24年,佢講嘢不嬲都係咁架啦。佢講某啲嘢可以好正經,但面對面閒談都係廢話多,都慣㗎喇,我哋後生仔,冇辦法啦。」由此可見,文總的廢話水平也有一定份量,可惜沒有幾多球迷留意到,他續說:「好唔服囉,冇理由淨係講佢唔講我,可能係唔夠佢出名啦,佢勁啲嘛。我諗佢都係畀我薰陶,我先係宗師,佢呢啲好皮毛。」

記者/攝影:禤家民

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

《體蘋果》陪你睇波講波

包羅萬有,「體」得舒服,即Like「蘋果體育」FB專頁!
BannerBanner