求驗客手記:夏神回勇 奧比歷甩難 
西甲叮噹「馬」頭

更新時間 (HKT): 2021.05.03 02:00

手機用戶請按此放大圖表

皇家馬德里喺歐聯同西甲雙線爭冠,一班老將都已經準備好喺季尾搏老命,喺周三歐聯四強次回合再戰車路士決勝負前,上周六就先喺西甲贏番一場打強心針,主場擊敗奧沙辛拿2:0,繼續緊貼榜首馬德里體育會,維持兩分之差;如果真係乘勢周中喺歐聯都過關入決賽,都真係唔好睇小施丹帶領呢支老人軍團做雙冠王嘅機會。

皇馬呢場波同奧沙辛拿半場先踢成0:0,換邊後踢到去76分鐘先打破僵局,靠上周中對車路士有好表現嘅中堅艾達米列達奧先開紀錄,之後再由卡斯米路再下一城,奠定2:0勝局。雖然話要後半段先入到波,贏得都唔係清風送爽,但對皇馬嚟講真係收貨,話晒隊波咁多30歲以上嘅老將,唞唔夠3、4日又要踢,𠵱家仲喺西甲同歐聯有得爭冠,都真係要拍吓手掌讚隊波嘅韌力。

施丹大讚周三或鬥「車」

施丹賽後都有讚班球員,事關球隊上半場射門多達13腳,係球隊今季所有賽事嚟計上半場最多嘅一次,但就好遺憾一球都入唔到,不過好彩下半場都有兩球「士哥」。不過,施丹最開心就係加盟後傷多過踢嘅夏薩特,呢場波係佢自1月尾以嚟首次踢正選,踢咗72分鐘表現唔錯,上半場亦有腳威脅射門,可惜就被撲出。施丹好滿意咁話:「佢踢得幾出色,企位好近賓施馬,所以可以有啲配合做到,我基本上好滿意佢今場嘅表現。」

唔知「夏神」可唔可以說服到施丹,喺周三有個正選位倒戈車仔,但呢位主帥明顯比較憂心嘅係半場傷出嘅法國同胞中堅華拉尼:「我諗要等等軍醫嘅詳細報告,但佢本人就同我講係小事,周中可以踢到歐聯,望係咁望啦!」

問題12碼無阻馬體會贏波

既要重歐聯,但西甲都繼續唔可以放棄,特別係馬體會呢排都唔係好穩,上輪輸完畀畢爾包後,呢場作客尾二嘅艾爾切,竟然只係靠馬高斯洛蘭迪一箭定江山險勝1:0,而且仲爭少少完場前被追和,唔係博到12碼嘅艾爾切,唔好彩因為操刀嘅費度查維斯射中柱宴客,呢場波可能以1:1結束,而且回帶顯示,馬體會門將奧比歷當時完全企出白界線撲波,有專家認為球證其實應該判重射。點都好,皇馬家陣同馬體會分數咁接近,加上巴塞隆拿同西維爾後上封王亦未絕望,西甲季尾鬥到咁激烈都真係少見。

包羅萬有,「體」得舒服,即Like「蘋果體育」FB專頁!
BannerBanner