Goal富帥:賓菲加鬥志爆棚可「圖」利

更新時間 (HKT): 2021.05.04 02:00

歐洲唔少主流聯賽嘅冠軍都已經塵埃落定,不過前列爭奪仲好激烈;葡超士砵亭個冠軍都幾穩陣,雖然前三都有得踢下屆歐聯,不過第二就直入分組賽,第三就要踢外圍賽,始終有一定風險,星期四就有場二哥之爭,賓菲加(圖)主場對波圖,平手盤,鬥志行先要賓菲加。

呢場波都幾微妙,波圖落後士砵亭6分排第2,贏波拎到3分,仲叫做有得威脅吓士砵亭個王位,不過賽前淨係領先第3位嘅賓菲加4分,萬一輸波爭冠就當然唔使再講,連第二位都有機會俾賓菲加搶埋。相反賓菲加個第三位真係好穩,呢場波係梗博贏波挑戰波圖個次席。

近況方面賓軍近11場贏10場,今季主場只有一場冇波入;波圖上次聯賽輸要數到上年10月,不過歐聯出局後,戰績就有少少滑落。嚟到季尾,始終都係鬥志同體能行先,呢方面賓菲加就佔優。賠率方面,世界博彩公司平均值,賓菲加主W就2.36倍,波圖就2.87倍,預計開平手盤賓菲加低水,睇盤主隊就可靠啲。

同日另一場葡超,摩里倫斯主場對國民隊;國民隊𠵱家就包尾,作客任人魚肉,摩里倫斯雖然都算風流波,開個平手盤畀大家賭,我就覺得引入去買國民隊嘞。

文:Goal進

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner