壁球主席盃|九月遇車禍爆肺斷肋骨 前一哥李浩賢久休復出取開門紅

更新時間 (HKT): 2021.05.05 20:24
養傷半年終告復出,李浩賢(圖)指會「盡做」,努力提升狀態。

2021壁球主席盃今日(周三)假香港壁球中心開鑼,港隊前一哥李浩賢(Max)去年九月遭遇車禍後首次亮相正式賽事,並於首圈過關,Max賽後指車禍後曾擔心未能再拾球拍,慶幸最終能健康回歸,「打唔打返波就後話啦,最緊要人無事先。」

33歲的李浩賢去年九月於屯門公路駕駛期間失控撞壆致肋骨骨折,留院超過兩周後出院。闊別賽場多月,他今日正式復賽,首圈直落三局(11:0、11:1、11:3)淘汰小將羅泊棋。Max賽後透露車禍後肋骨變形、爆肺,血壓和心跳亦受影響,他一度以為會就此退役,「當時喺車聞到汽油味係有啲擔心,去到醫院無情情話要做手術,又爆肺,好多嘢困擾,但好多人同我講健康最重要,打唔打返波就後話啦,最緊要人無事先。」休養數月,經歷多次身體檢查,他兩個月前才正式復操,「依家條氣好啲,冇咁chok,我爆咗肺後唞氣唔係幾好,諗返之前生活仲衰過退役,郁都冇得郁。」他指現已告痊癒,生活無礙,惟肋骨變形影響打球動作,「有啲動作做唔到,例如做唔到掌上壓,因為(肋骨)下面一堆神經線,對打壁球唔會話好大影響,係打波有啲位係練唔到,冇辦法。」Max形容現時能重新打球已是一項成就,談及未來比賽及目標時,他笑言會「盡做」,努力提升個人水平。

今次主席盃為去年初肺炎爆發以來首項公開予觀眾入場的壁球賽事,多名港將皆有報名,比賽一連四日上演,明日的八強事將於香港壁球中心表演場舉行,二號種籽李浩賢外,頭號種籽葉梓豐今日擊敗杜韋諾,八強會對黃祉謙,女子組方面,頭號種籽廖梓苓會鬥謝依霖,二號種籽何子樂將與新星陳善鈺爭四強席位,前者今以局數3:0(11:3、11:2、11:2)擊敗衛思穎晉級。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

《體蘋果》陪你睇波講波

包羅萬有,「體」得舒服,即Like「蘋果體育」FB專頁!
BannerBanner