Goal富帥:「挪超拜仁」被拆骨吼「細」

更新時間 (HKT): 2021.05.11 02:00

上星期重心推介佐加頓斯上盤,竟然輸0:2畀迪加科斯,錄得今季首敗,不過咁,足智彩又竟然唔開盤,跟唔到嘅朋友又可以慳番,阿Q啲講都叫做有運。

北歐聯賽陸續開鑼,睇足智彩開盤,挪超比瑞超穩定,周中兩國都開快車,今次就揀挪超。賭挪超,大家上季有跟波杜基林特,應該贏到開巷,號稱「挪超拜仁」嘅佢哋擅長極高位壓迫,呢招又真係幾屈,足足拋離第2位嘅莫迪19分拎聯賽冠軍(圖),全季轟入103球,平均每場入3.4球,真係單邊都夠開「大」。不過人怕出名豬怕肥,新一季面對主力流失,上季轟入19球兼做埋挪超足球先生嘅辛卡拿祖,就去咗屈福特。正前鋒卡斯柏真卡就走左搵日圓,加盟浦和紅鑽。兩條友上季加埋入咗46球,佔全隊45%,有幾重要唔使多講。

雖然新一季波杜揭幕戰冇咩影響,主場都照大炒特林素3:0,不過咁,一嚟主場,二嚟特林素防守真係幾差,星期三波杜基林特就作客基斯迪辛德,就未必咁予取予攜。基斯迪辛德首戰就作客輸兩粒畀莫迪,連埋季前賽,基軍都四場冇入過波。不過相信球隊都有自知之明,今次主場對波杜,一定玩泊大巴,不求入波,但求死守,盡量減少失波,今次敲入球「細」。

要數最有資格挑戰波杜霸業,就一定係莫迪,揭幕戰就輕取對手,保持攻守平衡作風,星期四就作客,對手只不過係特林素,亞洲盤初盤讓半/一,莫迪上盤冇問題。

文:Goal進

截稿前馬會尚未開盤,盤口僅供參考,讀者記得留意足智彩網頁。

資料寶藏:基斯迪辛德上季15場主場只失26球,平均每場只失1.7球。

包羅萬有,「體」得舒服,即Like「蘋果體育」FB專頁!
BannerBanner