Goal富帥:鯨魚崩潰讓唔起心跳

更新時間 (HKT): 2021.05.14 02:00

周中兩場澳職都中「讓球」盤,今期就玩日職;正所謂見高拜見低踩,堂堂日職二哥名古屋鯨魚,近4場已經輸3場,最慘係連防守都唔見得好,星期六作客清水心跳仲要讓平/半,梗係要下盤。

鯨魚曾幾何時都算係川崎前鋒最大挑戰者,不過4月尾5月頭接連2場都唔夠前鋒嚟,仲要失足七球,真係信心崩潰。雖然前仗都叫反到少少底,以1:0小勝大阪櫻花,但周中再遇鹿島鹿角就慘被技術性擊倒,輸夠0:2,球隊頭10輪只失1粒,不過踢到家陣16場,失波就大增至12球,都幾慘情。

見住鯨魚個澳洲靚仔龍蘭格歷克(圖)失吓又一球,失到信心都冇埋,而且都有唔少低級犯錯,加上周中又砌完鹿角,仲未有好轉之前,都係唔好追佢哋反底住。

清水心跳叻就唔係叻,不過叫做有自知之明,識得屯重兵防守,雖然贏波就唔多,開季至今只贏兩場,不過都和到六場,1分1分咁慢慢執。今次主場對鯨魚都一定先求死守,鯨魚就算贏都好難大炒,一於要下盤加個[2/2.5球]「細」。

講開前鋒效應,周中就爆大冷喇,川崎前鋒主場竟然喺兩度領先下,最終同仙台維加泰踢成2:2,場波前鋒讓兩球/兩球半,真係輸死唔少上盤友,仙台維加泰係今季日職第三支球隊,對住榜首前鋒唔使輸,都算幾威水。

星期六回師主場,仙台維加泰對福岡黃蜂,竟然開個平手盤,仙台和到前鋒咁勁,有平手盤賭咁着數?我就一定唔係咁睇,和完前鋒,一定成隊散晒,班球員體能邊回復到,季初已經睇好福岡黃蜂呢支「升班馬」,聯賽唔聲唔聲已經四連勝,仲要贏廣島三箭、FC東京幾支實力唔錯嘅對手,呢場波平手盤一定要黃蜂啦。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner