求驗客手記:與迪甘斯破冰 麥巴比讚好 
賓施馬重返法國隊

更新時間 (HKT): 2021.05.20 02:00

皇家馬德里前鋒賓施馬自從喺2015年涉嫌利用性愛錄影片段,企圖勒索法國國家隊隊友華布拿後,就一直未有再入選國家隊。雖然佢已經缺席咗2016年歐國盃同2018世界盃2屆大賽,但今季憑住出色表現,終於成功打動法國教練迪甘斯。迪甘斯禮拜二公佈今夏歐國盃嘅26人大軍名單當中,賓施馬事隔接近六年終於獲得重召,連後輩基利安麥巴比知道後都讚好。

曾寸基奧特高卡車級數

賓施馬上次披上高盧雄雞戰衣已係2015年10月嘅事,之後因涉嫌勒索華布拿冇份入國家隊之外,呢位皇馬前鋒仲曾經公開炮轟迪甘斯係因為種族歧視先冇徵召佢,當時兩人關係已經跌到冰點。本以為賓施馬嘅國家隊生涯已經告一段落,但近年賓施馬成功喺皇馬擔大旗,得以重新入選國家隊,相當興奮嘅賓施馬立即喺twitter宣佈呢個消息:「我要多謝屋企人、球會、朋友同埋一直支持我嘅人。」

至於今次賓施馬之所以獲得解凍回歸國家隊,迪甘斯就話自己一早已經同呢位皇馬前鋒傾過,而且仲解決咗大家之間嘅分歧:「我唔會講我同賓施馬傾過啲乜,最重要係佢𠵱家返咗嚟。」過去賓施馬幫法國隊踢大賽嘅時候,球隊成績一般,最好一次就係2014年世界盃喺8強止步,而且佢亦好招積,曾經以F1同高卡車之比去寸另一位隊友基奧特級數比唔上佢。

中前場超班馬迪爾落選

今夏歐國盃被視為奪冠次熱嘅法國,喺賓施馬回歸後,26人大軍名單可以話係星光熠熠。前線除咗基沙文、基奧特、麥巴比同京士利高文呢幾位鐵膽之外,今季喺法甲同德甲表現亮眼嘅賓耶達同馬古斯杜林亦有份,相反今季喺曼聯冇太多表現、近期先至傷癒復操嘅安東尼馬迪爾就落選。雖然鋒線人才濟濟,但係後防線就相對令人冇咁放心,今季喺皇馬有唔少甩漏嘅華拉尼預計會係正選中堅,不過其他中堅好似派斯奴甘佩比、基文迪朗格勒或者葛特蘇馬都唔算穩陣,就算有洛里斯把守最後一關,後防隨時成為法國今夏歐國盃嘅致命傷。

至於過去一直都係皇馬收購目標嘅麥巴比,就終於有機會喺國家隊同賓施馬合作,唔知係咪預告埋來季佢兩個都會幫皇馬一齊打江山,呢位22歲法國前鋒得知賓施馬回歸嘅消息後,喺ig上載咗張同賓施馬着住法國隊戰衣慶祝嘅相。

包羅萬有,「體」得舒服,即Like「蘋果體育」FB專頁!
BannerBanner