求驗客手記:德國重召梅拿、曉姆斯

更新時間 (HKT): 2021.05.20 02:00

禮拜三德國國家隊公佈今夏歐國盃嘅26人大軍名單,好似賓施馬重返法國咁,自從2018年11月後就未有再入選國家隊嘅拜仁慕尼黑中場湯馬士梅拿同多蒙特後衞曉姆斯,終於再次獲徵召。早喺2019年為咗推動德國隊年輕化,教練路維決定將梅拿、曉姆斯同謝路美保定3位2014年世界盃冠軍功臣踢出國家隊,不過路維因改革未見成效而飽受批評,去到今年3月,明顯見到路維嘅立場有所動搖,遲遲未有對三人回歸國家隊作正面回應。

直至禮拜三公佈大軍名單後,梅拿同曉姆斯終於有機會再次披上德國戰衣,對於自己重返國家隊,梅拿即刻喺社交網站公佈喜訊:「重新返到國家隊,我已經準備好參加歐國盃!」曉姆斯就話對於可以再次為德國隊出戰感到開心同自豪。對於梅拿同曉姆斯回歸,路維喺記者會上解釋咗原因:「佢哋兩個今季表現出色,喺球場上嘅領導能力,可以為球隊帶嚟唔少得益。佢哋知道德國隊嘅理念,而且都贏到唔少球員嘅尊重。」

包羅萬有,「體」得舒服,即Like「蘋果體育」FB專頁!
BannerBanner