求驗客手記:助祖記捧盃衣錦還鄉?
C朗英意西大滿貫

更新時間 (HKT): 2021.05.21 02:00

祖雲達斯喺周三意大利盃決賽以2:1擊敗阿特蘭大,第14次捧起呢項賽事嘅獎盃,隊中門將保方臨走前都總算有盃落袋。盛傳今夏有機會離開祖記嘅前鋒基斯坦奴朗拿度(C朗)更加贏盡晒英格蘭、西班牙同意大利所有賽事嘅冠軍!

保方基艾沙隔代捧盃

今季表現跌watt嘅祖記喺意盃決賽總算做番齣好戲,31分鐘先由古路施夫斯基禁區內混戰妙射破網先開紀錄。雖然阿特蘭大完半場前靠馬利路夫斯基禁區頂勁射扳平,不過祖雲達斯喺73分鐘由費達歷高基艾沙單刀射入成2:1,祖記繼17/18球季後再次贏得意盃冠軍。

今場為祖記正選把關嘅意大利門神保方早前宣佈今季結束後離隊,所以今次嘅意盃就成為佢幫祖記贏嘅最後一項錦標。連埋今屆比賽,43歲嘅保方已經贏過6次意盃,佢喺98/99球季效力帕爾馬嗰陣同前意大利國腳基艾沙一齊捧盃,22年後佢就同基艾沙個仔費達歷高又捧多次盃,呢位不老門神真係堪稱經典!

C朗職業生涯第32冠

不過除咗保方外,C朗亦都相當威水,佢自2018年加盟祖記之後雖然已經贏過2次意甲同意超盃,不過意盃就要等到今季先至初嘗捧盃滋味。今次已經係C朗職業生涯贏嘅第32個冠軍,不過更加勁嘅係,計埋佢過去效力曼聯同皇家馬德里,C朗已經贏齊晒英超、西甲同意甲三個聯賽嘅所有本土錦標!

最近有傳C朗今季結束後,有機會提前一年離開祖記,佢媽咪之前仲爆出呢位葡萄牙球星有機會重返母會士砵亭效力。當年C朗喺士砵亭就只係贏過葡超盃冠軍,唔知佢會唔會有機會返去贏埋葡超同葡盃,儲齊一套冠軍呢?C朗踢到36歲都仲老而彌堅,但佢祖記前隊友基迪拉就冇佢咁堅,呢位34歲嘅哈化柏林中場日前宣佈踢埋今季就退休。

包羅萬有,「體」得舒服,即Like「蘋果體育」FB專頁!
BannerBanner