球壇話當年|機場留艾力士 果敢簽大專球王成經典

更新時間 (HKT): 2021.05.23 07:10
艾力士(右)與朱sir今季又再重聚了。

朱sir與很多球員都關係好,最為球迷所知的,一定是艾力士與他在機場的故事。這件事大家一直都是聽艾力士的版本,今次由朱sir角度去講。

在艾力士口中,朱sir那一次在機場留人,改變了他的一生。同一件事,朱sir講得輕描淡寫,「其實呢啲咁嘅球員好多,因為以前非洲球員嚟搵球會,我記得應該得一個月簽證,最多延長一次。政府以前個政策係唔鼓勵你嚟搵工,有啲得七日㖭,唔得就上番飛機。」朱sir口中的版本,也不算很盪氣迴腸,「佢話要同我say goodbye,咁我就去咗機場,去到我叫佢唔好走,然後就留咗喺度。」當時在甲組沒有機會,朱sir甚至幫艾力士找球會,「我見佢咁有熱誠,佢話冇辦法,要走,我就同佢諗諗計,搵吓乙丙組球會踢住先,最後幫佢搵到東方。」這件改變艾力士一生的事,在朱sir口中好像只是簡單不過的平常事。

朱sir的經典,還有黃洋。大家都知道「大哥」本來已放棄職業足球,來港留學踢大專賽事後,才以28歲高齡加盟傑志,朱sir說:「嗰時大學踢友誼賽,我哋去睇,呢個嘢又幾好喎。」就算是「大專球王」、有申花青年軍等背景,要簽入一位已28歲的新秀,未必每間球會都有這個膽量。

不過,傑志似乎也不是唯一留意到黃洋的球會,朱sir說:「黃洋一畢業,可能都有其他球會搵佢,但當時佢上到灣仔(傑志辦公室舊址),佢話:『朱sir我畀你個熱誠打動咗。』嗰時佢冇踢過,可能正常球會都係畀一萬蚊,但我嗰時都畀咗個大學畢業人工佢。一次見面就同佢簽咗㗎喇,睇過佢踢兩次,仲有次五人賽,一傾就知佢個人好好,個頻率啱。」朱sir看人很準,「大哥」踢到今年38歲,第10個球季了,仍然是傑志和港足的「大哥」。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

《體蘋果》陪你睇波講波

包羅萬有,「體」得舒服,即Like「蘋果體育」FB專頁!
BannerBanner